پاکستان: پی ٹی آئی کا سپریم کورٹ کے باہر احتجاج، بانی کی صحت پر تشویش

اسلام آباد – پاکستان میں سابق وزیراعظم عمران خان کی جماعت تحریک انصاف (پی ٹی آئی) کے رہنماؤں نے جمعہ کو ملک کی سپریم کورٹ کے باہر احتجاج کیا، جس کے بعد چیف جسٹس یحییٰ آفریدی سے ملاقات ممکن ہوئی۔
پارٹی کے سینئر رہنما سلمان اکرم راجہ نے چیف جسٹس سے 30 منٹ کی ملاقات میں اڈیالہ جیل میں قید بانی پی ٹی آئی کی صحت سے متعلق تحفظات کا اظہار کیا۔
خیبر پختونخوا کے وزیر اعلیٰ سہیل آفریدی سمیت متعدد پارٹی رہنما اور کارکن عدالت کے باہر جمع ہوئے جہاں سیکیورٹی کے سخت انتظامات کیے گئے تھے۔
طبی معائنے پر تنازع
ذرائع کے مطابق حکومت نے بانی پی ٹی آئی کے ذاتی معالج کو جیل میں بھیجنے سے انکار کر دیا ہے۔ پی ٹی آئی نے نجی اسپتال کے دو ڈاکٹرز کے ذریعے طبی معائنے کی درخواست کی ہے جس پر حکومت غور کر رہی ہے۔
سلمان راجہ نے میڈیا سے بات کرتے ہوئے کہا، "بانی پی ٹی آئی کی صحت سے آگے ہمیں کچھ قبول نہیں۔ ہمارا مطالبہ ہے کہ انہیں رہا کیا جائے اور جب تک مقدمات ختم نہیں ہوتے انہیں خاندان تک رسائی دی جائے۔”
انہوں نے کہا کہ پمز اسپتال اور جیل میں ہونے والے واقعات کی تفصیلی رپورٹ فراہم کرنے کی یقین دہانی کرائی گئی ہے۔
آئندہ لائحہ عمل
پی ٹی آئی کی سیاسی کمیٹی علامہ راجہ ناصر عباس اور محمود اچکزئی کی سربراہی میں آج اجلاس کر کے مزید احتجاج کی حکمت عملی طے کرے گی۔
عمران خان گزشتہ سال اگست سے مختلف مقدمات میں اڈیالہ جیل میں قید ہیں۔