(24 نیوز )مشرقی زیمبیا میں ایک شخص ہاتھیوں کے جھنڈ سے بچنے کے لیے دریا میں چھلانگ لگا گیا، لیکن بدقسمتی سے مگرمچھ نے اسے اپنی لپیٹ میں لے لیا۔
52 سالہ دین نیرندا اپنے دو دوستوں کے ساتھ شکار سے واپس آ رہا تھا کہ اچانک جنگلی ہاتھیوں کے سامنے آ گئے۔ ہاتھیوں سے بچنے کے لیے وہ اور اس کے دوست محفوظ مقام کی تلاش میں بھاگے، اور اس دوران نيرندا نے دریائے لوانگوا کے قریب ایک برساتی نالے میں چھلانگ لگا دی۔
مقامی پولیس چیف روبرٹسن مویمبا نے بتایا کہ جیسے ہی نیرندا نے چھلانگ لگائی، ایک مگرمچھ نے اس پر حملہ کر دیا اور اس کی دائیں ران پر کاٹ لیا۔نیرندا نے ہمت دکھائی اور مگرمچھ کو لاٹھی سے مار کر پیچھے ہٹنے پر مجبور کیا، جس کے بعد وہ پانی سے باہر نکلنے میں کامیاب ہو گیا۔
دور سے صورتحال دیکھنے والے دو دوست فوراً پہنچے اور اسے دریا کے کنارے منتقل کیا، لیکن شدید خون بہنے کی وجہ سے وہ جانبر نہ ہو سکا، زیمبیا میں ہاتھیوں کی بڑی تعداد موجود ہے اور پچھلے برسوں میں انسان اور جنگلی جانوروں کے تصادم میں درجنوں ہلاکتیں ہو چکی ہیں۔ دریائے لوانگوا، جو جنوبی لوانگوا نیشنل پارک سے گزرتا ہے، نیل کے مگرمچھوں کی سب سے بڑی آماجگاہوں میں سے ایک ہے۔
ریسورس افریقہ کے اعداد و شمار کے مطابق 2023 میں جنگلی جانوروں کی وجہ سے ہونے والی 26 ہلاکتوں میں 15 مگرمچھوں کے حملوں کی وجہ سے ہوئی تھیں، جن میں زیادہ تر دریائے لوانگوا کے علاقے میں پیش آئیں۔
زیمبیا کے حکام نے مقامی لوگوں اور سیاحوں پر بارہا زور دیا ہے کہ وہ ایسے علاقوں میں سفر کے دوران انتہائی احتیاط کریں جہاں جنگلی جانور کثرت سے موجود ہوں، یہ واقعہ اس وقت یاد دلایا گیا جب 2021 میں ایک 18 سالہ برطانوی طالبہ میڈلین امیلی اوزبورن اسمتھ پر وکٹوریہ فالز کے قریب دریائے زامبیزی میں مگرمچھ نے حملہ کیا تھا۔
یہ بھی پڑھیں :اسلام آباد خود کش دھماکا، داعش افغانی ماسٹر مائنڈ سمیت 4 سہولت کار گرفتار
