برمنگھم: مسجد کے باہر چاقو حملہ، 18 سالہ پاکستانی نژاد برطانوی نوجوان جاں بحق

اسمیتھوِک، برمنگھم —
برطانیہ کے شہر برمنگھم کے قریب اسمیتھوِک علاقے میں جمعہ کی رات ایک دردناک واقعہ پیش آیا جب اولڈبری روڈ پر واقع جامع مسجد کے باہر چاقو حملے میں 18 سالہ پاکستانی نژاد برطانوی نوجوان زیشان افضل جاں بحق ہو گیا۔
ویسٹ مڈلینڈز پولیس کے مطابق رات تقریباً 9 بجے مسجد کی پارکنگ میں تشدد کا یہ واقعہ اس وقت پیش آیا جب نمازِ تراویح کے بعد نمازی باہر نکل رہے تھے۔   زیشان افضل کو سنگین زخموں کی حالت میں پایا گیا اور بعد ازاں وہ دم توڑ گیا، جبکہ دو دیگر نوجوان — 19 اور 22 سالہ — بھی زخمی ہوئے جنہیں ہسپتال منتقل کیا گیا، تاہم ان کی حالت خطرے سے باہر بتائی گئی ہے۔ 
پولیس نے نمازیوں کو واپس مسجد کے اندر جانے کی ہدایت کی اور علاقے کو سیل کر دیا۔ فرانزک ٹیمیں موقع پر موجود ہیں اور مسجد کی پارکنگ میں نیلا خیمہ نصب کیا گیا ہے۔ 
پولیس نے واضح کیا کہ اگرچہ واقعہ ماہِ رمضان میں پیش آیا، لیکن فی الحال اسے مذہبی یا نسلی بنیادوں پر نہیں دیکھا جا رہا۔ تحقیقات ابتدائی مرحلے میں ہیں، سی سی ٹی وی فوٹیج کا جائزہ لیا جا رہا ہے اور گھر گھر تحقیقات جاری ہیں۔ 
ویسٹ مڈلینڈز پولیس نے قتل کا مقدمہ درج کر کے تحقیقات شروع کر دی ہیں اور علاقے میں پولیس کی نفری بڑھا دی گئی ہے۔ پولیس نے عوام سے اپیل کی ہے کہ جن کے پاس بھی موبائل فون یا ڈیش کیم فوٹیج ہو، وہ فوری طور پر رابطہ کریں۔