سازشیں کرنے والوں کو واضح پیغام دے دیا، افغانستان میں پاک فضائیہ کی کارروائی شہداء کے لہو کا بدلہ ہے — طارق فضل چودھری

وفاقی وزیرِ پارلیمانی امور طارق فضل چودھری نے افغانستان میں پاکستانی فضائیہ کی کامیاب کارروائی کا خیرمقدم کرتے ہوئے کہا ہے کہ پاکستان کے خلاف سازشوں کا واضح جواب دے دیا گیا ہے اور فتنہ الخوارج کے ٹھکانوں کو پاک فضائیہ کے شاہینوں نے کامیابی سے نشانہ بنایا ہے۔ 
سماجی رابطے کی ویب سائٹ ایکس پر جاری کردہ بیان میں انہوں نے کہا کہ یہ کارروائی صرف ایک آپریشن نہیں بلکہ ہر اس ماں کے آنسوؤں کا جواب ہے جس نے اپنے بیٹے کو وطن کی دفاع میں قربان کیا، اور ہر اس بچے کے خوابوں کا تحفظ ہے جو ایک محفوظ پاکستان چاہتا ہے۔ 
وفاقی وزیر نے کہا کہ پاکستان کو کمزور سمجھنے کی غلطی کرنے والے یاد رکھیں کہ ہم امن کے خواہاں ہیں مگر اپنی سرزمین، عوام اور وقار پر کوئی سمجھوتہ نہیں کریں گے۔ 
واضح رہے کہ پاکستان نے انٹیلی جنس بنیاد پر جوابی کارروائی میں پاک افغان سرحدی علاقوں میں ٹی ٹی پی اور اس کے اتحادیوں کے سات دہشت گرد کیمپوں اور ٹھکانوں کو نشانہ بنایا۔ حکومتی بیان کے مطابق حالیہ خودکش حملوں میں اسلام آباد کی امام بارگاہ، باجوڑ اور بنوں کے واقعات میں افغانستان میں موجود قیادت ملوث تھی۔