دوحہ: وزیراعظم محمد شہباز شریف نے آج دوحہ میں قطر کے نائب وزیراعظم و وزیر مملکت برائے دفاعی امور شیخ سعود بن عبدالرحمن الثانی سے ملاقات کی اور قطر بزنس مین ایسوسی ایشن کے وفد سے بھی اہم نشست کی۔
وزیراعظم اور قطر کے نائب وزیراعظم کے درمیان ملاقات میں دفاع اور سیکیورٹی کے شعبوں میں دوطرفہ تعاون کا جائزہ لیا گیا۔ وزیراعظم نے دونوں ممالک کی مسلح افواج کے مابین جاری تعاون پر اطمینان کا اظہار کیا اور دفاعی شراکت داری کو مزید مستحکم کرنے کے پاکستان کے عزم کا اعادہ کیا۔ شیخ سعود نے پاکستانی مسلح افواج کی پیشہ ورانہ مہارت کو سراہتے ہوئے دفاعی تعاون کے فروغ میں قطر کی گہری دلچسپی ظاہر کی۔
ملاقات میں علاقائی صورتحال، بالخصوص ایران اور افغانستان سے متعلق امور پر بھی تبادلہ خیال ہوا۔ دونوں فریقین نے خطے میں امن و استحکام کے لیے مذاکرات، کشیدگی میں کمی اور اجتماعی کوششوں کی اہمیت پر زور دیا اور تمام شعبوں میں اسٹریٹجک شراکت داری کو مزید بلند کرنے کے مشترکہ عزم کا اظہار کیا۔
قطر بزنس مین ایسوسی ایشن سے ملاقات
اس کے علاوہ وزیراعظم نے قطر بزنس مین ایسوسی ایشن (QBA) کے وفد سے بھی ملاقات کی جس کی قیادت ایسوسی ایشن کے چیئرمین شیخ فیصل بن قاسم الثانی نے کی۔ وزیراعظم نے پاکستان اور قطر کے تجارتی روابط مضبوط بنانے میں QBA کے کردار کو سراہا اور نجی شعبے کی قیادت میں باہمی تعاون کو دوطرفہ شراکت داری کا اہم ستون قرار دیا۔
انہوں نے پاکستان کے بہتر ہوتے معاشی اشاریوں اور اصلاحاتی اقدامات سے آگاہ کرتے ہوئے قطری تاجروں کو انفراسٹرکچر، لاجسٹکس، توانائی، زراعت، ٹیکنالوجی اور برآمداتی مینوفیکچرنگ کے شعبوں میں سرمایہ کاری کی دعوت دی۔ وزیراعظم نے سرمایہ کاروں کے لیے ون ونڈو سہولت فراہم کرنے میں خصوصی سرمایہ کاری سہولت کونسل (SIFC) کے کردار کو بھی اجاگر کیا۔
شیخ فیصل بن قاسم الثانی نے پاکستان میں سرمایہ کاری کے مواقع تلاش کرنے میں گہری دلچسپی ظاہر کی۔ دونوں فریقین نے قریبی روابط برقرار رکھنے پر اتفاق کیا اور رواں ماہ کے آخر میں پاک-قطر سرمایہ کاری ٹاسک فورس کے دوحہ دورے کا بھی فیصلہ کیا تاکہ مذاکرات کو ٹھوس اقتصادی شراکت داری میں تبدیل کیا جا سکے۔
دونوں ملاقاتوں میں نائب وزیراعظم و وزیر خارجہ اسحاق ڈار، وفاقی وزیر اطلاعات عطاء اللہ تارڑ اور وزیراعظم کے معاون خصوصی طارق فاطمی بھی موجود تھے۔
