نیویارک کے میئر ظہران ممدانی کا ایران پر حملوں کو "غیر قانونی جارحانہ جنگ” قرار دیتے ہوئے شدید مذمت

نیویارک — نیویارک سٹی کے میئر ظہران ممدانی نے ایران پر امریکہ اور اسرائیل کے مشترکہ فوجی حملوں کی شدید الفاظ میں مذمت کرتے ہوئے انہیں "غیر قانونی جارحانہ جنگ” قرار دیا ہے۔
سوشل میڈیا پلیٹ فارم ایکس پر اپنے بیان میں میئر ممدانی نے کہا کہ ایران کے شہروں پر بمباری اور معصوم شہریوں کی ہلاکتیں انتہائی المناک اور تباہ کن پیش رفت ہے۔ انہوں نے خبردار کیا کہ یہ اقدامات خطے کو ایسی تباہی کی جانب دھکیل رہے ہیں جس کا کوئی اختتام نظر نہیں آتا۔ انہوں نے واضح کیا کہ امریکی عوام ایک نیا جنگی محاذ کھولنے کے حق میں نہیں اور یہ کارروائیاں عوامی امنگوں کے یکسر برعکس ہیں۔
میئر ممدانی نے نیویارک میں مقیم ایرانی نژاد امریکی شہریوں سے خصوصی طور پر مخاطب ہوتے ہوئے کہا: "ایرانی نژاد نیویارکرز اس شہر کی بنیادوں اور ساخت کا لازمی حصہ ہیں — آپ ہمارے پڑوسی ہیں اور آپ اس شہر میں مکمل محفوظ ہیں۔”
سیاسی تجزیہ کاروں کا کہنا ہے کہ میئر کا یہ سخت موقف ڈیموکریٹک حلقوں اور انسانی حقوق کی تنظیموں کے ان خدشات کی عکاسی کرتا ہے جو اس جنگ کے عالمی اثرات پر گہری تشویش رکھتے ہیں۔ واضح رہے کہ ظہران ممدانی جنوبی ایشیائی نژاد پہلے مسلمان میئر ہیں جنہوں نے اس سال نیویارک کا انتخاب جیتا۔