اسلام آباد —بیورو رپورٹ محمد سلیم سے اسلام آباد یونین آف جرنلسٹس نے صحافی برادری کی فلاح و بہبود کے لیے ایک اہم پیش رفت کرتے ہوئے نایاب لیب کے ساتھ مفاہمتی یادداشت (ایم او یو) پر دستخط کر دیے ہیں۔ اس معاہدے کے تحت یونین کے ممبران اور ان کے اہلِ خانہ کو نایاب لیب کی تمام دستیاب میڈیکل ٹیسٹنگ پر 40 فیصد خصوصی رعایت فراہم کی جائے گی۔
معاہدہ نایاب لیب کے سی ای او نواب ظہیرالدین شیخ کے ساتھ طے پایا، جس کا بنیادی مقصد صحافیوں کو معیاری اور سستی طبی سہولیات کی فراہمی کو یقینی بنانا ہے۔ دستخطی تقریب میں اسلام آباد یونین آف جرنلسٹس کے صدر فیاض تنولی، جنرل سیکرٹری سردار سجاد طارق، فنانس سیکرٹری ملک نجیب اور دیگر عہدیداران نے شرکت کی۔
دستخط کی تقریب کے بعد نایاب لیب کے سٹاف نے یونین کے نمائندوں کو پوری لیب کا تفصیلی وزٹ کروایا اور سی ٹی سکین سیکشن کا خصوصی معائنہ کروایا۔ اس موقع پر بتایا گیا کہ لیب میں نصب سی ٹی سکین مشین جدید ترین ماڈل کی ہے، جس کی ایک نمایاں خصوصیت یہ ہے کہ اس کی مضر اثرات شعاعیں دیگر مشینوں کی نسبت 60 فیصد کم ہیں، جو مریضوں کی صحت کے لیے انتہائی محفوظ ہے۔ لیب کے سٹاف نے یقین دہانی کرائی کہ اسلام آباد یونین آف جرنلسٹس کے ہر ممبر کو بہترین معیار کی سروسز فراہم کی جائیں گی۔
اسلام آباد یونین آف جرنلسٹس کے چیئرمین شاہ نواز خان نے اس موقع پر کہا کہ یہ معاہدہ صحافیوں کی فلاح کے لیے ایک سنگ میل کی حیثیت رکھتا ہے، جس سے ممبران اور ان کے اہلِ خانہ کو براہِ راست فائدہ پہنچے گا۔ انہوں نے عزم ظاہر کیا کہ مستقبل میں بھی صحافی برادری کے لیے مزید فلاحی اقدامات کیے جاتے رہیں گے۔
