آزاد کشمیر سے بھارتی ایجنٹ گرفتار: حساس تنصیبات کی ریکی کا نیٹ ورک بے نقاب

IMG 20260416 WA2107


مظفرآباد (بین الاقوامی/ملکی رپورٹ): آزاد جموں و کشمیر پولیس نے راولاکوٹ میں ایک بڑی کارروائی کرتے ہوئے بھارتی خفیہ ایجنسی ‘را’ (RAW) کے مبینہ ایجنٹ کو گرفتار کر لیا ہے۔ ملزم کی شناخت عرفان کے نام سے ہوئی ہے، جو حساس تنصیبات کی ریکی کر کے ویڈیوز اور تصاویر بنا کر دشمن ملک کو منتقل کر رہا تھا۔
آزاد کشمیر پولیس کے انسپکٹر جنرل کیپٹن (ر) لیاقت علی ملک نے مظفرآباد میں پریس کانفرنس کرتے ہوئے بتایا کہ راولاکوٹ پولیس نے بروقت انٹیلی جنس بنیاد پر کارروائی کر کے عرفان کو گرفتار کیا۔ ملزم سوشل میڈیا کے ذریعے را کے ہینڈلر ‘شاہد’ سے رابطے میں تھا اور اسے آن لائن نوکری یا دیگر لالچ دے کر استعمال کیا جا رہا تھا۔
ملزم کا اعتراف: عرفان نے تفتیش کے دوران اعتراف کیا کہ اسے انٹرنیٹ کے ذریعے آن لائن نوکری کی پیشکش کی گئی تھی۔ اس کے بعد وہ حساس مقامات (فوجی تنصیبات، تعلیمی اداروں اور دیگر اہم جگہوں) کی ریکی کرتا، ویڈیوز اور لوکیشن کی تفصیلات بنا کر اپنے ہینڈلر کو بھیجتا رہا۔ پولیس کا دعویٰ ہے کہ وہ فوجی تنصیبات اور تعلیمی اداروں پر ممکنہ حملوں کی منصوبہ بندی میں بھی ملوث تھا۔
آئی جی پولیس نے بتایا کہ یہ گرفتاری را کے جاسوسی نیٹ ورک کو بے نقاب کرنے کی طرف ایک اہم قدم ہے۔ ملزم سے مزید تفتیش جاری ہے تاکہ اس نیٹ ورک سے جڑے دیگر افراد تک رسائی حاصل کی جا سکے۔
واضح رہے کہ چند روز قبل سکیورٹی اداروں نے را کے لیے جاسوسی کرنے والے تین افراد کو نارووال، بہاولپور اور آزاد کشمیر کے ضلع نیلم سے گرفتار کیا تھا۔
پولیس نے ملزم کے خلاف آفیشل سیکرٹ ایکٹ کے تحت مقدمہ درج کر لیا ہے اور قانونی کارروائی جاری ہے۔

متعلقہ پوسٹ