اسلام آباد: سپریم کورٹ نے بانی پاکستان تحریک انصاف (پی ٹی آئی) سے ملاقاتوں پر عائد پابندی کے خلاف دائر درخواست پر سماعت کرتے ہوئے متعلقہ حکام سے جواب طلب کر لیا ہے۔
عدالت نے سپرنٹنڈنٹ اڈیالہ جیل، ہوم سیکرٹری پنجاب، ایڈووکیٹ جنرل اسلام آباد اور ایڈووکیٹ جنرل پنجاب کو نوٹس جاری کرتے ہوئے تفصیلی جواب جمع کرانے کی ہدایت کی۔
سماعت کے دوران درخواست گزار کے وکیل نے مؤقف اختیار کیا کہ بانی پی ٹی آئی سے اہلِ خانہ، وکلا اور پارٹی رہنماؤں کی ملاقاتوں پر غیر ضروری پابندیاں عائد کی جا رہی ہیں، جو قانونی اور آئینی حقوق کے منافی ہیں۔
عدالت نے فریقین کے ابتدائی دلائل سننے کے بعد متعلقہ حکام سے وضاحت طلب کرتے ہوئے کیس کی مزید سماعت تین ہفتوں کے لیے ملتوی کر دی۔
سپریم کورٹ نے ہدایت کی کہ آئندہ سماعت پر تمام فریقین اپنی رپورٹس اور قانونی مؤقف کے ساتھ عدالت میں پیش ہوں تاکہ معاملے کا تفصیلی جائزہ لیا جا سکے۔
یہ کیس بانی پی ٹی آئی کی جیل میں ملاقاتوں سے متعلق انتظامی پابندیوں اور ان کے قانونی جواز کے حوالے سے اہمیت اختیار کر گیا ہے۔
