دبئی: فضا میں ’’ہیومن گلیکسی زیڈ فولڈ ۸‘‘ لانچ، ۲۰ اسکائی ڈائیورز کا منفرد مظاہرہ

سیمسنگ گلف الیکٹرانکس نے اپنے نئے فولڈیبل اسمارٹ فون Galaxy Z Fold8 کی لانچ کو یادگار بنانے کے لیے دبئی کے آسمان میں ایک غیر معمولی فضائی مظاہرہ پیش کیا۔ ۲۰ پیشہ ور اسکائی ڈائیورز نے Skydive Dubai کے تعاون سے تقریباً ۱۲ ہزار فٹ کی بلندی پر آزادانہ چھلانگ لگا کر انسانی جسموں کی مدد سے Galaxy Z Fold8 کی شکل تشکیل دی۔ اس ایونٹ کا پس منظر دبئی کی مشہور پام جمیرہ تھا۔ رپورٹ کے مطابق اسکائی ڈائیورز نے آزادانہ پرواز (Freefall) کے دوران انتہائی درست ہم آہنگی کے ساتھ اپنی پوزیشنیں تبدیل کرتے ہوئے فون کے نئے ڈیزائن کی انسانی شکل تشکیل دی، جسے بعد میں سیمسنگ کی تشہیری مہم کا حصہ بنایا گیا۔
سیمسنگ کے مطابق Galaxy Z Fold8 کمپنی کا اب تک کا سب سے ہلکا Galaxy Z Fold ہے، جس کا وزن صرف ۲۰۱ گرام ہے۔ اس میں 10:16 کور اسکرین اور 4:3 مین ڈسپلے دیا گیا ہے، جو پڑھنے، ویڈیوز دیکھنے، گیمنگ اور ملٹی ٹاسکنگ کے لیے زیادہ بڑا اور آرام دہ تجربہ فراہم کرتا ہے۔ یہ فون ۲۲ جولائی کو لندن میں ہونے والی Galaxy Unpacked تقریب میں عالمی سطح پر متعارف کرایا گیا تھا۔ تمام شریک اسکائی ڈائیورز نے Galaxy Watch Ultra2 یا Galaxy Watch9 پہن رکھی تھیں، جن کی مدد سے انہوں نے چھلانگ کے دوران اپنی رفتار، وقت اور ایک دوسرے سے فاصلہ انتہائی درست انداز میں برقرار رکھا۔
اس مہم میں متحدہ عرب امارات کے معروف XDubai ایتھلیٹ، اسکائی ڈائیور اور جیٹ سوٹ پائلٹ احمد الشحی بھی شریک ہوئے، جنہوں نے زمین سے فضاء تک پورے سفر کو دستاویزی شکل دی۔ سیمسنگ گلف الیکٹرانکس کے موبائل ایکسپیرینس ڈویژن کے نائب صدر فادی ابو شامات نے کہا: ’’بہترین اختراعات انسانوں کو نئی صلاحیتوں کے اظہار اور مزید بلندیوں تک پہنچنے کا حوصلہ دیتی ہیں۔ Galaxy Z Fold8 بھی اسی سوچ کی نمائندگی کرتا ہے۔‘‘ انہوں نے مزید کہا کہ دبئی کے جذبے سے متاثر ہو کر کمپنی نے اس فون کی آمد کو ایسے انداز میں منانے کا فیصلہ کیا جو خود اس کی طرح جرات مندانہ ہو، اور فولڈیبل ڈیوائس کے تصور کو متحدہ عرب امارات کے آسمانوں میں حقیقی شکل دے دی گئی۔