فلم "ریس ۴” میں عامر خان کے ساتھ سدھارتھ ملہوترا اور ٹائیگر شروف کا داخلہ

tigsid d


ممبئی — بالی ووڈ کی مقبول ایکشن تھریلر فرنچائز "ریس” ایک بار پھر خبروں میں ہے۔ ابتدائی دو فلموں میں سیف علی خان مرکزی کردار میں نظر آئے تھے، جبکہ تیسرے حصے میں ان کی جگہ سلمان خان نے لی تھی۔ اب فرنچائز کے چوتھے حصے کو لے کر بڑی خبر سامنے آئی ہے: رپورٹس کے مطابق عامر خان "ریس ۴” میں مرکزی کردار ادا کر سکتے ہیں، جبکہ نئی نسل کے دو مقبول اداکار سدھارتھ ملہوترا اور ٹائیگر شروف بھی فلم کا حصہ بن سکتے ہیں۔
پنک ولا کی ایک رپورٹ کے مطابق تینوں اداکاروں نے فلم کی اسکرپٹ سنی ہے اور انہیں کہانی پسند آئی ہے۔ عامر خان کو فلم کا آئیڈیا خاص طور پر پسند آیا ہے اور وہ محض اداکاری تک محدود نہیں رہیں گے بلکہ رائٹرز کے ساتھ اسکرپٹ پر بھی کام کر رہے ہیں۔ تاہم فلم ابھی ابتدائی مرحلے میں ہے اور کاسٹنگ کا باضابطہ اعلان سامنے نہیں آیا۔ رپورٹ کے مطابق میکرز ایک ایسی بڑے پیمانے کی تھرلر کہانی پیش کرنا چاہتے ہیں جو ہندوستانی سنیما میں پہلے دیکھنے کو نہ ملی ہو، تاکہ فرنچائز کو نئے انداز میں پیش کیا جا سکے۔
پروڈیوسر رمیش تورانی نے "ریس ۴” کی پری پروڈکشن پر کام شروع کر دیا ہے، جبکہ ہدایت کاری کیلئے وجے کرشن آچاریہ کا نام سامنے آ رہا ہے — جو عامر خان کے ساتھ ۲۰۱۳ء کی سپرہٹ فلم "دھوم ۳” میں کام کر چکے ہیں، جس نے دنیا بھر میں تقریباً ۵۵۸ کروڑ روپے کا کاروبار کیا تھا۔ اگر تینوں اداکار ایک ساتھ نظر آئے تو یہ "ریس” فرنچائز کے لیے ایک بڑی کاسٹنگ تبدیلی ہوگی۔

متعلقہ پوسٹ