اپوزیشن نے بڑے پیمانے پر حراست کی مذمت کی، نہا بورا بھی حراست میں

CMs Detained


مغربی بنگال کی سابق وزیر اعلیٰ ممتا بنرجی، کیرالہ کے سابق وزیر اعلیٰ پنارائی وجین، دہلی کے سابق وزیر اعلیٰ اروند کیجریوال اور دیگر لوگوں کو حراست میں لیے جانے کی تصویریں۔تصویر:ایکس/دی وائر (کینوا کی مدد سے)

جنتر منتر پر مجوزہ احتجاج کے درمیان بڑے پیمانے پر لوگوں کو حراست میں لینے کی کارروائی جاری ہے۔ احتجاج میں شامل ہونے جا رہی آئیسا کی صدر نہا بورا اور دیگر مظاہرین کو صفدرجنگ ایئرپورٹ فلائی اوور پر روک کر حراست میں لے لیا گیا ہے۔ نہا دیگر مظاہرین کے ساتھ گرین پارک سے جنتر منتر کے لیے  مارچ کر رہی تھیں۔ اپوزیشن جماعتوں نے حراست کی ایسی کارروائیوں کی مذمت کی ہے۔

نئی دہلی:دہلی میںسنیچر (10اکتوبر) کو مختلف تنظیموں کی اپیل پر مجوزہ احتجاج کو روکنے کے لیے دہلی پولیس نے سخت کارروائی کی ہے۔ پوری نئی دہلی میں لاک ڈاؤن جیسی صورتحال ہے اور مظاہرین کو جمع ہونے کی اجازت نہیں دی جا رہی ہے۔ بڑے پیمانے پر رہنماؤں اور طلبہ کو حراست میں لیا جا رہا ہے۔

آل انڈیا اسٹوڈنٹس ایسوسی ایشن(آئیسا)کی صدر نہا بورا اور دیگر مظاہرین کو صفدرجنگ ایئرپورٹ فلائی اوور پر روک کر حراست میں لے لیا گیا۔ نہا دیگر مظاہرین کے ساتھ گرین پارک سے جنتر منتر کے لیے  مارچ کر رہی تھیں۔

سی پی آئی(ایم ایل)لبریشن نے سوشل میڈیا پر ایک ویڈیو پوسٹ کیا ہے، جس میں دہلی پولیس نہا بورا کو حراست میں لیتی نظر آ رہی ہے۔ اس دوران دیگر مظاہرین پولیس کی بس کو روکتے نظر آ رہے ہیں۔

نہا نے ایکس پر ایک پوسٹ میں لوگوں سے تحریک جاری رکھنے کی اپیل کی ہے۔

’اگر ایک سابق وزیر اعلیٰ کے ساتھ ایسا سلوک ہو رہا ہے، تو ملک میں عام آدمی کی کیا حالت ہوگی؟‘-جان برٹاس

اس دوران راجیہ سبھا کے رکن جان برٹاس نے کیرالہ کے سابق وزیر اعلیٰ پنارائی وجین کو دہلی میں پولیس وین میں گھمانے پر سوال اٹھایا ہے۔

ایکس پر پوسٹ کیے گئے ایک ویڈیو میں برٹاس نے کہا کہ چھترسال اسٹیڈیم میں 30 سے 45 منٹ تک رکھنے کے بعد دہلی پولیس انہیں، کیرالہ کے سابق وزیر اعلیٰ پنارائی وجین اور کیرالہ کے سابق وزیر خزانہ کے این بالگوپال کو دوبارہ پولیس وین میں بٹھا کر قومی راجدھانی میں گھما رہی ہے۔

برٹاس نے سوال کیا،’اگر ایک سابق وزیر اعلیٰ کے ساتھ ایسا سلوک کیا جا رہا ہے تو اس ملک میں عام آدمی کی کیا حالت ہوگی؟‘

اس سے پہلے وجین کو کیرالہ ہاؤس کے باہر سی پی آئی(ایم)کے دیگر رہنماؤں کے ساتھ حراست میں لیا گیا تھا۔

پرامن مظاہرین کی گرفتاری پر ٹی ایم سی نے اٹھائے سوال

ترنمول کانگریس (ٹی ایم سی)نے ایکس پر ایک پوسٹ میں لکھا،’ہمارے جمہوری نظام میں پرامن مظاہرین کو گرفتار کرنا کب سے نارمل بات ہو گئی؟ جب پرامن اختلاف رائے کا جواب بات چیت کے بجائے گرفتاریوں سے دیا جاتا ہے، تو اس سے ہماری جمہوری اقدار کی صورتحال پرگمبھیرسوال کھڑے ہوتے ہیں۔‘

پارٹی نے مزید لکھا،’مودی-شاہ کی جوڑی  بھلے ہی لگاتار حدیں پار کرتی رہے، لیکن کوئی بھی حکومت جوابدہی سے اوپر نہیں ہے اور نہ ہی کوئی اقتدار مستقل ہے۔ نریندر مودی، یہ یاد رکھیے! جمہوریت کے لیے یہ ایک سیاہ دن ہے۔‘

پارٹی کی صدر ممتا بنرجی کو بھی حراست میں لے لیا گیا ہے۔

عآپ نے مودی حکومت کو نشانہ بنایا

عام آدمی پارٹی(عآپ)کے سربراہ اروند کیجریوال کو بھی حراست میں لے لیا گیا ہے۔

حراست میں لیے جانے سے پہلے کیجریوال نے کہا،’مودی اور شاہ دہلی میں تانا شاہی  کا ناچ کر رہے ہیں۔ ہر کونے پر پولیس اور نیم فوجی دستے تعینات ہیں۔ ہمیں اپنے گھروں سے باہر نکلنے تک کی اجازت نہیں ہے۔‘

عام آدمی پارٹی نے ایکس پر لکھا،’شاید وزیر اعظم مودی اور وزیر داخلہ امت شاہ بھول گئے ہیں کہ سڑکوں پر کیلیں بچھانے کاحشر کیا ہوتا ہے۔ مودی حکومت ووٹ چور گیانیش کمار کو بچانا بند کرے، ورنہ وہ دن دور نہیں جب مودی جی کو دوبارہ ٹی وی پر آ کر کہنا پڑے گا کہ ’شاید میری تپسیا میں کچھ کمی رہ گئی تھی۔‘

پارٹی نے مزید لکھا،’یہ جمہوریت ہے۔ پرامن احتجاج کرنا ہر شہری کا حق ہے۔ بابا صاحب کے اس ملک میں بی جے پی کی آمریت نہیں چلے گی‘!

’جنتر منتر اب ایک نئی بیداری اور شعور کی علامت ہے:‘اکھلیش یادو

سماجوادی پارٹی کے صدر اکھلیش یادو نے ایکس پر لکھا،’ہم ملک کے نوجوانوں کی توانائی کے ساتھ ہیں۔ اگر بی جے پی حکومت یہ سمجھ رہی ہے کہ وہ طاقت کے بل پر عوام کو روک لے گی تو یہ اس کی اور بھی بڑی بھول ثابت ہوگی۔ جنتر منتر اب محض ایک جگہ کا نام نہیں، بلکہ ایک نئے شعور اور بیداری کی علامت بن گیا ہے۔ اگر حکومت نے تحریک چلانے والوں کو روکا تو ملک میں ہر جگہ جنتر منتر بن جائے گا۔‘

چیف جسٹس کی مداخلت کے بعد سپریم کورٹ کے وکیلوں کی رہائی: رپورٹ

بار اینڈ بنچ کی رپورٹ کے مطابق، چیف جسٹس آف انڈیا(سی جے آئی)سوریہ کانت کی جانب سے حکام سے بات کرنے کے بعد حراست میں لیے گئے وکیلوں کو رہا کیا جا رہا ہے۔

سپریم کورٹ بار ایسوسی ایشن(ایس سی بی اے)، سپریم کورٹ ایڈووکیٹس آن ریکارڈ ایسوسی ایشن اور سالیسٹر جنرل تشار مہتہ نے وکیلوں کو حراست میں لیے جانے کے بارے میں چیف جسٹس کو جانکاری دی تھی۔

دہلی پولیس نے راج گھاٹ پر ریوولیوشنری ورکرز پارٹی آف انڈیااور دیشا اسٹوڈنٹس آرگنائزیشن کے ارکان کو حراست میں لیا

صحافی پیوش رائے نے ایک ویڈیو پوسٹ کیا ہے، جس میں نئی دہلی کے راج گھاٹ پر دہلی پولیس ریوولیوشنری ورکرز پارٹی آف انڈیا اور دیشا اسٹوڈنٹس آرگنائزیشن کے ارکان کو زبردستی حراست میں لیتی دکھائی دے رہی ہے۔



Source link

متعلقہ پوسٹ