پاکستان نے پہلے ٹیسٹ کے دوسرے روز سری لنکا کے خلاف پہلی اننگز میں 320 رنز کی برتری حاصل کر لی، مہمان ٹیم نے کھیل ختم ہونے تک تین وکٹوں کے نقصان پر 114 رنز بنائے۔
راولپنڈی کرکٹ سٹیڈیم میں منگل کو پاکستان نے اپنی پہلی اننگز نو وکٹوں کے نقصان پر 434 رنز بنا کر ڈکلیئر کر دی۔ سعود شکیل 93 رنز بنا کر سنچری مکمل نہ کر سکے۔
پاکستان نے دوسرے روز اپنی پہلی اننگز 281 رنز پانچ کھلاڑی آؤٹ سے دوبارہ شروع کی تو سعود شکیل اور غازی غوری نے چھٹی وکٹ کے لیے 96 رنز کی شراکت قائم کی۔ غازی غوری 48 رنز بنا کر آؤٹ ہوئے۔
پاکستان کی جانب سے ڈیبیو کرنے والے عرافات منہاس نے بھی 52 رنز کی اننگز کھیلی۔ پاکستان کی پہلی اننگز میں پانچ کھلاڑیوں نے نصف سنچریاں سکور کیں۔
اس سیکشن میں متعلقہ حوالہ پوائنٹس شامل ہیں (Related Nodes field)
سری لنکا کی جانب سے اسیتھا فرنینڈو اور دلشان مدوشنکا نے تین، تین وکٹیں حاصل کیں۔
جواب میں سری لنکا نے دن کے اختتام تک تین وکٹوں کے نقصان پر 114 رنز بنائے اور اسے پاکستان کی پہلی اننگز کا سکور برابر کرنے کے لیے مزید 320 رنز درکار ہیں۔
سری لنکا کے لہرو اودارا 42 رنز بنا کر آؤٹ ہوئے، جبکہ کامندو مینڈس اور دھننجایا ڈی سلوا 49 رنز کی ناقابل شکست شراکت کے ساتھ کریز پر موجود ہیں۔
پاکستان کی جانب سے ثاقب خان دو وکٹیں حاصل کر کے نمایاں بولر رہے۔
خراب روشنی کے باعث دوسرے روز کا کھیل مقررہ وقت سے پہلے ختم کر دیا گیا۔ دونوں ٹیموں کے درمیان سیریز کا پہلا ٹیسٹ بدھ کو تیسرے روز بھی راولپنڈی میں جاری رہے گا۔
