لاہور (اسپورٹس ڈیسک) — چیئرمین پاکستان کرکٹ بورڈ (پی سی بی) محسن نقوی نے سری لنکن ٹیم کی جانب سے دورۂ پاکستان جاری رکھنے کے فیصلے پر اظہارِ تشکر کیا ہے۔ اُنہوں نے کہا کہ پاکستان کرکٹ کے شائقین مہمان ٹیم کی بہادری اور کھیل کے جذبے کو سراہتے ہیں۔
محسن نقوی نے کہا کہ سری لنکن کرکٹ بورڈ اور کھلاڑیوں نے دوستی اور کھیل کے فروغ کی بہترین مثال قائم کی ہے۔ اُنہوں نے یقین دہانی کرائی کہ پی سی بی غیر معمولی سیکیورٹی انتظامات کو یقینی بنائے گا تاکہ کھلاڑی پرسکون ماحول میں کھیل سے لطف اندوز ہو سکیں۔
چیئرمین پی سی بی نے کہا کہ پاکستان کھیلوں کے ذریعے دنیا کو امن، بھائی چارے اور مثبت پیغام دینا چاہتا ہے۔ اُنہوں نے امید ظاہر کی کہ سری لنکا کے بعد دیگر بین الاقوامی ٹیمیں بھی پاکستان آنے میں دلچسپی دکھائیں گی۔
