کالاباغ ڈیم شاندار منصوبہ ہے مگر قومی یکجہتی مقدم، اگر وفاق کو نقصان پہنچے تو اس کے حق میں نہیں ہوں: وزیرِ اعظم

اسلام آباد ()وزیرِ اعظم نے کہا ہے کہ کالاباغ ڈیم ایک شاندار معاشی منصوبہ ضرور ہے، مگر قومی یکجہتی اور وفاقی ہم آہنگی سے بڑھ کر کوئی چیز نہیں۔ اُنہوں نے واضح کیا کہ اگر کالاباغ ڈیم کے قیام سے وفاق یا کسی صوبے کو نقصان پہنچنے کا خدشہ ہو تو وہ اس منصوبے کے حق میں نہیں ہوں گے۔
وزیرِ اعظم نے کہا کہ ملک کی ترقی اور معیشت کی مضبوطی کے لیے توانائی کے منصوبے ناگزیر ہیں، لیکن ایسے تمام فیصلے صرف قومی اتفاقِ رائے اور مکمل مشاورت کے بعد ہی کیے جانے چاہییں۔ اُنہوں نے متعلقہ وزارتوں کو ہدایت دی کہ ڈیم منصوبوں کے حوالے سے تمام صوبوں کے خدشات دور کیے جائیں اور ماحولیاتی و اقتصادی پہلوؤں کو سامنے رکھتے ہوئے حتمی سفارشات پیش کی جائیں۔
وزیرِ اعظم نے افغانستان سے مطالبہ کیا ہے کہ وہ اپنی سرزمین پر موجود دہشت گرد گروہوں کو لگام دے اور پاکستان کے خلاف کارروائیوں میں ملوث عناصر کے خلاف فوری ایکشن لے۔ اُنہوں نے کہا کہ پاکستان کسی صورت دہشت گردی کو برداشت نہیں کرے گا، اور اگر حملے سرحد پار سے ہو رہے ہیں تو اُن کی روک تھام کی ذمہ داری افغان حکومت پر عائد ہوتی ہے
وزیرِ اعظم نے سیکیورٹی اداروں کو ہدایت دی کہ سرحدی نگرانی مزید سخت کی جائے اور دہشت گرد نیٹ ورکس کے خاتمے کے لیے مربوط حکمتِ عملی اختیار کی جائے۔ اُنہوں نے عالمی برادری سے بھی اپیل کی کہ خطے میں پائیدار امن کے لیے افغانستان پر دباؤ بڑھایا جائے تاکہ دہشت گردوں کی پناہ گاہیں ختم کی جا سکیں۔