ایران نے امریکہ کو مذاکرات کی شرائط بھیج دیں، واشنگٹن سے جلد موقف واضح کرنے کا مطالبہ

تہران: ایران کی اعلیٰ قومی سلامتی کونسل کے سیکریٹری محسن رضائی نے ہفتے کو تصدیق کی کہ تہران نے قطر اور پاکستان کے ثالثوں کے ذریعے امریکہ کے ساتھ مذاکرات دوبارہ شروع کرنے اور جنگ ختم کرنے کے لیے اپنی شرائط بھیج دی ہیں۔
ایرانی خبر رساں ایجنسی مہر کے مطابق رضائی نے ایک انٹرویو میں کہا کہ امریکہ کو ان شرائط پر جلد اپنا موقف واضح کرنا ہوگا، اور جنگ ختم کرنے کا فیصلہ اسی پر منحصر ہے۔ ان کا کہنا تھا کہ ایران کے بارے میں صدر ڈونالڈ ٹرمپ کا اندازہ پوری طرح غلط ثابت ہوا اور یہ جنگ اسرائیلی وزیر اعظم بنیامین نیتن یاہو کے اکسانے پر شروع ہوئی۔ انہوں نے خبردار کیا کہ ٹرمپ کی دھمکیوں کا کوئی نتیجہ نہیں نکلے گا اور ایران فیصلہ کن جنگ کے لیے تیار ہے۔
قطری ثالث کے ذریعے بھیجی گئی اہم شرائط میں یہ شامل ہیں:
تمام محاذوں پر فوجی تصادم اور جنگ کی مکمل بندش
امریکہ کی ضبط کی ہوئی تمام ایرانی املاک کی بحالی
ایرانی بندرگاہوں پر عائد بحری ناکہ بندی کا فوری خاتمہ
رضائی نے دعویٰ کیا کہ ایرانی افواج امریکی فوج کی کمزوریوں سے واقف ہیں اور امریکی فضائی حملوں کا سامنا کرنے کی اہل ہیں۔ ان کے مطابق ایران نے حال ہی میں ایک امریکی طیارہ بردار جہاز کے قریب بحری جہاز شکن میزائل کا کامیاب تجربہ بھی کیا۔ انہوں نے کہا کہ امریکہ کے سابقہ معاہدے سے دستبردار ہونے کے بعد تہران کو واشنگٹن کے بارے میں اپنی حکمت عملی بدلنا پڑی۔
جوہری عدم پھیلاؤ کے معاہدے (این پی ٹی) پر رضائی نے کہا کہ امریکہ اور اسرائیل کے جارحانہ اقدامات ایران کو اس سے نکلنے کی بنیاد فراہم کرتے ہیں، تاہم حتمی فیصلہ نہیں ہوا اور یہ امریکہ کے طرزِ عمل پر منحصر ہوگا۔ ان کے مطابق ایران فی الحال بڑے پیمانے پر تباہی کے ہتھیاروں پر پابندی کے فتوے اور اپنے جوہری نظریے پر قائم ہے، لیکن مستقبل کی ضمانت نہیں دی جا سکتی۔ یمن اور سعودی عرب کے تعلقات پر انہوں نے کہا کہ ایران تنازع کا خاتمہ چاہتا ہے۔
دوسری جانب ایرانی پارلیمنٹ کے اسپیکر اور چیف مذاکرات کار محمد باقر قالیباف نے اتوار کو کہا کہ سفارتی محاذ پر ایران کا موقف "واضح، منطقی اور اٹل” ہے اور ثالثوں کے ذریعے پیغامات اور شرائط فریقِ مقابل تک پہنچا دی گئی ہیں۔ انہوں نے واضح کیا کہ مذاکرات کی سابقہ شرائط کی طرف واپسی یا آبنائے ہرمز دوبارہ کھولنے کی کوئی گنجائش نہیں۔