اسلام آباد (محمد سلیم سے ) : پاکستان کے دورے پر آئے ہوئے مالدیپ کے صدر ڈاکٹر محمد معیزو کے اعزاز میں بدھ کو وزیراعظم ہاؤس میں باضابطہ استقبالیہ تقریب منعقد ہوئی۔
وزیراعظم محمد شہباز شریف نے وزیراعظم ہاؤس آمد پر معزز مہمان کا پرتپاک خیرمقدم کیا۔ دونوں رہنماؤں نے گرمجوشی سے مصافحہ کیا اور خوشگوار جملوں کا تبادلہ کیا۔ تقریب کے آغاز پر دونوں ممالک کے قومی ترانے بجائے گئے۔
تینوں مسلح افواج کے چاق و چوبند دستوں نے مالدیپ کے صدر کو سلامی دی اور گارڈ آف آنر پیش کیا۔ سلامی کے چبوترے پر وزیراعظم شہباز شریف بھی ان کے ہمراہ موجود تھے۔ صدر معیزو نے گارڈ آف آنر کا معائنہ کیا۔
وزیراعظم نے کابینہ کے ارکان اور وزیراعظم ہاؤس کے اعلیٰ حکام کا مہمان سے تعارف کرایا، جبکہ مالدیپ کے صدر نے بھی اپنے وفد کو وزیراعظم سے متعارف کرایا۔
بعد ازاں صدر معیزو نے وزیراعظم ہاؤس کے سبزہ زار میں پودا لگایا، جس موقع پر دونوں ممالک کی ترقی و خوشحالی کے لیے دعا کی گئی۔
