ورلڈ بینک کا خوراک کے بحران کا انتباہ، 2026 میں خوراک کی قیمتوں میں 10 فیصد اضافے کی پیش گوئی

food 281026 d


واشنگٹن — ورلڈ بینک نے عالمی خوراک کی قیمتوں میں تیزی سے اضافے اور خوراک کے عدم تحفظ کے بڑھنے سے خبردار کیا ہے۔ ادارے کی تازہ ”کموڈٹی مارکیٹس آؤٹ لک“ رپورٹ کے مطابق 2026 میں خوراک کی قیمتیں تقریباً 10 فیصد بڑھنے کا امکان ہے، جبکہ 2027 میں مزید 7 فیصد اضافہ متوقع ہے، یعنی دو سالوں میں مجموعی اضافہ تقریباً 18 فیصد ہوگا۔
رپورٹ کے مطابق بحیرہ اسود میں جنگ سے متاثرہ اناج کی ترسیل، انتہائی مضبوط ال نینو کے موسمی اثرات اور ایندھن و کھاد کی بلند قیمتوں نے زرعی پیداوار اور سپلائی زنجیروں پر دباؤ بڑھا دیا ہے۔ ال نینو کی وجہ سے متعدد خطوں میں خشک سالی، سیلاب اور شدید گرمی کے امکانات بڑھ رہے ہیں، جو فصلوں کی پیداوار کو متاثر کر سکتے ہیں۔
ورلڈ بینک نے پیش گوئی کی ہے کہ 2026 کے اختتام تک عالمی اجناس کی مجموعی قیمتیں 23 فیصد بڑھ سکتی ہیں، جبکہ توانائی کی قیمتیں اس سال 32 فیصد اضافے کے ساتھ چار سال کی بلند ترین سطح پر پہنچ سکتی ہیں۔ رپورٹ کے مطابق مشرق وسطیٰ کے تنازعے نے عالمی تیل کے ذخائر کم کر دیے ہیں اور آبنائے ہرمز سے سپلائی متاثر ہوئی ہے۔
ادارے نے خبردار کیا کہ اگر مشرق وسطیٰ میں تنازعہ مزید بڑھے، بحیرہ اسود میں اناج کی ترسیل پر حملے شدید ہوں یا ال نینو کے اثرات انتہائی ہوں تو خوراک کی قیمتیں بنیادی پیش گوئی سے 12 فیصد زیادہ ہو سکتی ہیں اور مکمل خوراک کے بحران کا خطرہ پیدا ہو سکتا ہے۔
ورلڈ بینک کے نائب چیف اکانومسٹ ایہان کوس نے کہا کہ اجناس کی منڈیاں بیک وقت کئی بڑے جھٹکوں کا سامنا کر رہی ہیں، جس سے افراط زر، خوراک کی عدم دستیابی اور اقتصادی ترقی کے خطرات بڑھ رہے ہیں۔ انہوں نے کم آمدنی والے ممالک اور غریب ترین افراد کی حفاظت کو ترجیح قرار دیا۔

متعلقہ پوسٹ