جنوبی امریکی ملک پیراگوئے میں بڑے ڈیجیٹل بینک ’یوئینو بینک‘ کی مالی مشکلات شدت اختیار کرنے کے بعد مرکزی بینک نے اس کا کنٹرول سنبھال لیا اور اس کے معمول کے کاروبار کو بند کرنے کا عمل شروع کردیا.
میڈیا رپورٹس کے مطابق اس کے نتیجے میں تقریباً 30 لاکھ صارفین اپنے اکاؤنٹس اور جمع شدہ رقم تک رسائی سے محروم ہوگئے۔
حکام کے مطابق یہ تعداد ملک کی بالغ آبادی کے تقریباً 60 فیصد کے برابر ہے، جبکہ پیراگوئے کی مجموعی آبادی تقریباً 65 لاکھ ہے۔ اس طرح ملک کی مجموعی آبادی کا بھی لگ بھگ نصف اس بینک سے وابستہ تھا۔
پیراگوئے کے مرکزی بینک نے 2 نومبر 2026ء کو متفقہ فیصلے کے ذریعے یوئینو بینک کے خلاف خصوصی کارروائی شروع کرنے کا اعلان کیا۔
مرکزی بینک کے مطابق بینک کا مالی استحکام اور سرمایہ کی قانونی حد سے مطابقت رکھنے والا تناسب مقررہ کم از کم معیار کے نصف سے بھی نیچے گر گیا تھا۔
اس صورتحال کے بعد بینک کا انتظام سرکاری حکام کے حوالے کردیا گیا، جبکہ اس کی موبائل ایپ، کارڈز اور دیگر خدمات معطل ہوگئیں۔ صارفین فوری طور پر اپنی رقم نکلوانے یا دوسرے اکاؤنٹس میں منتقل کرنے سے قاصر ہوگئے۔
یوئینونو بینک کے پاس تقریباً 80 کروڑ سے 85 کروڑ ڈالر کے سرکاری فنڈز بھی موجود تھے۔ ان میں تقریباً 38 کروڑ ڈالر پیراگوئے کے سرکاری پنشن اور صحت کے فنڈ کے شامل ہیں۔
