پاکستان کے وزیراعظم شہباز شریف نے ہفتے کو سعودی عرب کے دارالحکومت ریاض کو نشانہ بنانے والے حوثی حملوں کی مذمت کرتے ہوئے مملکت کے اپنے شہریوں اور سرزمین کے دفاع کے حق کی حمایت کا اعادہ کیا ہے۔
یہ بیان حوثیوں کے ایک ایسے حملے کے ردعمل میں دیا گیا جس میں ریاض کے کنگ عبداللہ فنانشل ڈسٹرکٹ میں واقع ایک ٹاور کی کئی منزلوں اور قریبی عمارتوں کو نقصان پہنچا۔
یمن میں آئینی حکومت کی بحالی کے لیے سرگرم سعودی قیادت والے اتحاد نے بتایا کہ سعودی فضائی دفاعی نظام نے ہفتے کی صبح سویرے یمن کی حوثی ملیشیا کی جانب سے ریاض کی طرف داغے گئے تین بیلسٹک میزائلوں کو فضا میں ہی روک کر تباہ کر دیا۔
انڈپینڈنٹ اردو کا واٹس ایپ گروپ یہاں جوائن کریں
حوثیوں نے سوشل میڈیا پلیٹ فارم ’ایکس‘ پر کہا کہ وہ ریاض سمیت پورے سعودی عرب میں اہداف کو نشانہ بنا رہے ہیں۔
مملکت کے محکمہ شہری دفاع (سول ڈیفنس) نے ریاض کے جنوب میں واقع گورنریٹ السلیل اور یمن کی سرحد کے قریب نجران میں بھی پیشگی وارننگ الرٹس جاری کیے ہیں۔
وزیراعظم شہباز شریف نے ’ایکس‘ پر اپنی پوسٹ میں مملکت پر حوثی حملوں کو ’بے باک جارحیت‘ قرار دیتے ہوئے کہا کہ شہری انفراسٹرکچر اور معاشی تنصیبات کو نشانہ بنانا قطعی ناقابلِ قبول ہے اور اس سے علاقائی امن و استحکام کو خطرات لاحق ہیں۔
أدين بشدة الهجوم الحوثي على مركز الملك عبدالله المالي في الرياض. إن مثل هذه الأعمال العدوانية المتهورة التي تستهدف البنية التحتية المدنية والمنشآت الاقتصادية غير مقبولة على الإطلاق، وتشكل تهديدا للسلام والاستقرار في المنطقة. وتقف باكستان بكل ثبات وتضامن إلى جانب المملكة العربية السعودية الشقيقة وشعبها. ونؤكد دعمنا الكامل لحق المملكة في الدفاع عن سيادتها وسلامة أراضيها، وحماية مواطنيها والمقيمين فيها. وسنواصل دعم جميع الجهود الرامية إلى تحقيق السلام الدائم والاستقرار في المنطقة.
— Shehbaz Sharif (@CMShehbaz) November 21, 2026
شہباز شریف نے کہا کہ ’پاکستان اپنے برادر ملک سعودی عرب اور اس کے عوام کے ساتھ غیر متزلزل یکجہتی کے ساتھ کھڑا ہے۔
’ہم مملکت کی خودمختاری اور علاقائی سالمیت کے دفاع اور اس کے شہریوں و مقیم افراد کے تحفظ کے حق کی مکمل حمایت کرتے ہیں۔‘
سعودی فضائی دفاع نے جمعے کو پانچ ڈرونز اور تین بیلسٹک میزائل تباہ کیے تھے، جن میں جازان کی طرف داغے گئے دو میزائل شامل تھے۔
اس سیکشن میں متعلقہ حوالہ پوائنٹس شامل ہیں (Related Nodes field)
حوثیوں کے خلاف یمن کی بین الاقوامی سطح پر تسلیم شدہ حکومت کی حمایت کرنے والے سعودی اتحاد نے کہا ہے کہ وہ صنعا، صعدہ اور تعز میں حوثیوں کے ٹھکانوں اور میزائل صلاحیتوں کے ساتھ ساتھ بحیرہ احمر کی بندرگاہ الحدیدہ میں واقع تنصیبات کے خلاف کارروائیاں کر رہا ہے۔
پاکستان اور سعودی عرب نے گذشتہ سال ستمبر میں ایک دوطرفہ دفاعی معاہدے پر دستخط کیے تھے، جس کے بعد سات اگست کو پاکستان، سعودی عرب اور ترکی کے درمیان ’مکہ مشترکہ دفاعی معاہدے‘ پر دستخط ہوئے۔
دونوں معاہدوں کے تحت کسی ایک رکن ملک پر حملے کو تمام رکن ممالک پر حملہ تصور کیا جاتا ہے۔
پاکستان نے اپنے حالیہ بیانات میں حوثیوں کو مملکت پر حملوں سے باز رہنے کا انتباہ کیا ہے۔
وزیراعظم شہباز شریف نے ’ایکس‘ پر اپنی پوسٹ میں مزید کہا کہ ’ہم خطے میں پائیدار امن و استحکام کے لیے تمام کوششوں کی حمایت جاری رکھیں گے۔‘
پاکستان کے نائب وزیراعظم اور وزیر خارجہ اسحاق ڈار نے سعودی عرب کے دارالحکومت ریاض کے کنگ عبداللہ فنانشل ڈسٹرکٹ پر حوثی حملے کی شدید ترین الفاظ میں مذمت کرتے ہوئے کہا ہے کہ شہری انفراسٹرکچر کو نشانہ بنانا انسانی جانوں اور علاقائی امن و سلامتی کے لیے خطرہ ہے، اور ایسے حملے فوری طور پر بند ہونے چاہییں۔
Condemn in the strongest terms the Houthi attack on the King Abdullah Financial District in Riyadh. The targeting of civilian infrastructure endangers lives and threatens regional peace and security. Such attacks must cease immediately. Pakistan stands firmly with the leadership and the people of Saudi Arabia. We fully support the Kingdom’s right to protect its citizens and residents and to safeguard its sovereignty and territorial integrity. @FaisalbinFarhan
— Ishaq Dar (@MIshaqDar50) November 21, 2026
اپنے بیان میں نائب وزیراعظم نے کہا کہ پاکستان سعودی عرب کی قیادت اور عوام کے ساتھ مضبوطی سے کھڑا ہے، اور مملکت کے اپنے شہریوں و مقیم افراد کے تحفظ اور اپنی خودمختاری و علاقائی سالمیت کے دفاع کے حق کی مکمل حمایت کرتا ہے۔

