کراچی (نمائندہ خصوصی وائس آف جرمنی) پاکستان اسٹاک مارکیٹ نے نئی تاریخ رقم کرتے ہوئے پہلی بار ایک لاکھ 60 ہزار پوائنٹس کی سطح عبور کرلی۔ کاروباری ہفتے کے آخری روز جمعہ کو مارکیٹ میں زبردست تیزی دیکھی گئی جس کے نتیجے میں سرمایہ کاروں کے اعتماد میں نمایاں اضافہ ہوا۔
وزیراعظم محمد شہباز شریف نے اس تاریخی موقع پر خوشی کا اظہار کرتے ہوئے کہا کہ یہ کامیابی اللہ تعالیٰ کے فضل، حکومت کی معاشی پالیسیوں اور کاروباری برادری کی انتھک محنت کا نتیجہ ہے۔ وزیراعظم نے کہا کہ اسٹاک مارکیٹ کا یہ نیا ریکارڈ ملکی معیشت کے استحکام اور ترقی کی جانب پیش رفت کا مظہر ہے۔
ماہرین کے مطابق انڈیکس میں تیزی کی بڑی وجہ بین الاقوامی مالیاتی اداروں کے ساتھ تعاون، روپے کی قدر میں بہتری اور کاروباری برادری کا حکومتی پالیسیوں پر بڑھتا ہوا اعتماد ہے۔ ان کا کہنا ہے کہ اگر یہی رجحان جاری رہا تو مارکیٹ مزید مثبت نتائج دے سکتی ہے۔
