دشمن کی جارحیت کے خلاف فوج اور عوام سیسہ پلائی دیوار ثابت ہوں گے، ڈی جی آئی ایس پی آر

پاک فوج کے شعبہ تعلقات عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے کہا ہے کہ دہشت گردی اور فتنۂ خوارج کے خلاف مؤثر اقدامات کیے گئے ہیں، جب کہ دشمن کی کسی بھی جارحیت کے خلاف پاک فوج اور عوام سیسہ پلائی ہوئی دیوار ثابت ہوں گے۔
ڈی جی آئی ایس پی آر نے مردان کی مختلف جامعات اور مدارس کے اساتذہ و طلبہ سے خصوصی نشست میں گفتگو کی۔ اس موقع پر عبد الولی خان یونیورسٹی، ویمن یونیورسٹی، یونیورسٹی آف انجینئرنگ اینڈ ٹیکنالوجی اور مختلف مدارس کے طلبہ اور اساتذہ شریک ہوئے۔
لیفٹیننٹ جنرل احمد شریف چوہدری نے معرکۂ حق، حالیہ پاک۔افغان کشیدگی اور ملک کی مجموعی سیکیورٹی صورتحال سمیت مختلف اہم موضوعات پر تفصیلی گفتگو کی۔
انہوں نے کہا کہ پاکستان نے دہشت گردی اور خوارج کے خلاف مؤثر اور نتیجہ خیز اقدامات کیے ہیں۔ دشمن کی کسی بھی جارحیت پر پاک فوج اور عوام ایک ساتھ ڈٹ کر مقابلہ کریں گے۔
خصوصی نشست کے دوران طلبہ اور اساتذہ نے غازیان اور شہدا کو زبردست خراجِ تحسین پیش کیا۔ ان کا کہنا تھا کہ ڈی جی آئی ایس پی آر کی گفتگو سے پاک فوج کے کردار اور قربانیوں کے حوالے سے کئی ابہام دور ہو گئے ہیں۔
طلبہ نے کہا کہ قوم امن و استحکام کی کوششوں میں پاک فوج کے کردار کو قدر کی نگاہ سے دیکھتی ہے، اور خیبر پختونخوا کے نوجوان ملکی سلامتی کے لیے پاک فوج کے شانہ بشانہ کھڑے ہیں۔
شرکا کا مزید کہنا تھا کہ انہیں اس نشست سے یہ شعور حاصل ہوا کہ کس طرح ملک دشمن عناصر سوشل میڈیا پر پاکستان اور افواج کے خلاف منفی پروپیگنڈا کرتے ہیں۔
اساتذہ نے اس عزم کا اظہار کیا کہ افواجِ پاکستان نے ملک کے دفاع کے لیے بے شمار قربانیاں دی ہیں، اور اب یہ قوم کی ذمہ داری ہے کہ وہ اپنی افواج کے شانہ بشانہ کھڑی رہے۔