وزیر اعظم محمد شہباز شریف نے جدت، انسانی ترقی اور عالمی تعاون کے حوالے سے اپنے خیالات “کیا انسانیت درست سمت میں جا رہی ہے؟” کے عنوان سے منعقدہ گول میز کانفرنس میں پیش کیے۔ یہ کانفرنس نویں فیوچر انویسٹمنٹ انیشی ایٹو (FII) کے دوران منعقد ہوئی۔
وزیر اعظم نے اپنے خطاب میں کہا کہ دنیا کو غربت، عدم مساوات، ماحولیاتی تبدیلی اور ٹیکنالوجی کے اثرات جیسے چیلنجز سے نمٹنے کے لیے مشترکہ عالمی کوششوں کی ضرورت ہے۔ انہوں نے اس عزم کا اظہار کیا کہ پاکستان پائیدار ترقی، جامع معاشی نمو اور عالمی شراکت داریوں کو فروغ دینے کے لیے پرعزم ہے۔
شہباز شریف نے اس بات پر زور دیا کہ انسانیت کی درست سمت کا تعین صرف تب ممکن ہے جب دنیا ہمدردی، تعاون اور مساوی ترقی کو اپنی ترجیحات میں شامل کرے۔
یہ کانفرنس عالمی رہنماؤں، پالیسی سازوں اور ماہرینِ فکر و دانش کا ایک اہم اجتماع تھی، جس میں دنیا کے مستقبل کے سماجی، معاشی اور تکنیکی رجحانات پر تبادلۂ خیال کیا گیا۔
