اسلام آباد میں نیشنل پریس کلب نے میڈک گیلریا انٹرنیشنل اور زکوٰۃ فاؤنڈیشن آف امریکہ کے اشتراک سے اپنے مسیحی ممبران اور اُن کے اہلِ خانہ کی خوشیوں میں شریک ہونے کے لیے کرسمس فیملی گالا کا شاندار انعقاد کیا۔ تقریب کے مہمانِ خصوصی وفاقی وزیر اطلاعات و نشریات عطا اللہ تارڑ تھے۔
تقریب میڈیا گیلریا کے سی ای او منصور شفیق، زکوٰۃ فاؤنڈیشن آف امریکہ کے پاکستان میں نمائندہ ڈاکٹر فضل الرحمان، رکن پنجاب اسمبلی و کوآرڈینیٹر وزیراعلیٰ پنجاب شازیہ رضوان افسر، وزیراعظم یوتھ پروگرام کے فوکل پرسن و سابق ڈپٹی میئر اسلام آباد سید ذیشان علی نقوی، ڈی آئی جی آپریشنز جواد طارق، پرنسپل انفارمیشن آفیسر مبشر حسن، ایم ڈی اے پی پی عاصم کھچی، شکاگو چیمبر آف کامرس کے صدر نوید انور، اسلام آباد چیمبر آف کامرس کے صدر سردار طاہر محمود، پی ایف یو جے کے صدر افضل بٹ، این پی سی کے صدر اظہر جتوئی، سیکرٹری نیئر علی، آر آئی یو جے کے صدر طارق علی ورک، این پی سی کے نائب صدر سید ظفر ہاشمی، سینئر جوائنٹ سیکرٹری سید شیراز گردیزی، جوائنٹ سیکرٹری سید عون شیرازی سمیت مسیحی ممبران اور اُن کے اہلِ خانہ کی بڑی تعداد نے شرکت کی۔
تقریب کے دوران مسیحی ممبران کی فیملیز اور بچوں میں کرسمس کے تحائف تقسیم کیے گئے، کرسمس کیک کاٹا گیا اور شرکاء کے لیے پرتکلف عشائیہ دیا گیا۔ نظامت کے فرائض نیلم ارشد اور سیکرٹری این پی سی نیئر علی نے انجام دیے۔
خطاب کرتے ہوئے وفاقی وزیر اطلاعات عطا اللہ تارڑ نے مسیحی برادری کو کرسمس کی مبارکباد دیتے ہوئے کہا کہ پاکستان کی تعمیر و ترقی میں مسیحی برادری کا کردار نمایاں ہے۔ تعلیم، صحت اور امن کے فروغ میں ان کی خدمات ناقابلِ فراموش ہیں۔ انہوں نے کہا کہ نیشنل پریس کلب کی یہ تقریب بین المذاہب ہم آہنگی کے فروغ میں اہم سنگِ میل ہے اور حکومت جلد مسیحی برادری کے لیے ایک بڑے پروگرام کا اعلان کرے گی۔
پی ایف یو جے کے صدر افضل بٹ نے کہا کہ نیشنل پریس کلب اپنے تمام ممبران کی خوشیوں میں برابر کا شریک ہے۔ این پی سی کے صدر اظہر جتوئی اور آر آئی یو جے کے صدر طارق علی ورک نے مہمانوں کا شکریہ ادا کرتے ہوئے کہا کہ مسیحی ہمارے بھائی ہیں اور کرسمس ہم سب کے لیے خوشیوں کا پیغام ہے۔
میڈک گیلریا کے سی ای او منصور شفیق نے کہا کہ اُن کے ادارے میں مسیحی برادری کے افراد اہم عہدوں پر خدمات انجام دے رہے ہیں اور پاکستان کا نام روشن کر رہے ہیں۔ ڈاکٹر فضل الرحمان نے کہا کہ امن پسند معاشرے بین المذاہب ہم آہنگی سے ہی مضبوط ہوتے ہیں، اور نیشنل پریس کلب کا یہ اقدام قابلِ تحسین ہے۔
شازیہ رضوان افسر، سید ذیشان علی نقوی اور دیگر مقررین نے بھی این پی سی کی قیادت کو اس شاندار تقریب کے انعقاد پر مبارکباد دی اور اسے رواداری و بھائی چارے کی روشن مثال قرار دیا۔
