اسلام آباد:محمد سلیم سے
وزیرِ اعظم محمد شہباز شریف اور متحدہ عرب امارات کے صدر شیخ محمد بن زاید النہیان نے دوطرفہ تعلقات کو مزید مستحکم بنانے اور امن، استحکام و پائیدار ترقی کے مشترکہ اہداف کے لیے قریبی تعاون جاری رکھنے کے عزم کا اعادہ کیا ہے۔
شیخ محمد بن زاید النہیان وزیرِ اعظم شہباز شریف کی دعوت پر سرکاری دورے پر پاکستان پہنچے، جو بطور صدرِ یو اے ای ان کا پاکستان کا پہلا سرکاری دورہ تھا۔ پاکستان کی فضائی حدود میں داخلے پر شاہی طیارے کو جے ایف-17 جنگی طیاروں نے سلامی دی۔ نور خان ایئربیس پر وزیرِ اعظم، نائب وزیرِ اعظم و وزیرِ خارجہ اسحاق ڈار، چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر سمیت اعلیٰ حکام نے معزز مہمان کا استقبال کیا۔
دورے کے دوران دونوں رہنماؤں کے درمیان تفصیلی بات چیت ہوئی، جس میں پاکستان اور متحدہ عرب امارات کے دیرینہ برادرانہ تعلقات کو مزید فروغ دینے پر تبادلۂ خیال کیا گیا۔ ملاقات میں جاری تعاون کے شعبوں میں ہونے والی پیش رفت کا جائزہ لیا گیا اور مختلف شعبوں میں شراکت داری کو وسعت دینے کے امکانات پر غور کیا گیا۔
دونوں فریقین نے اقتصادی تعاون، سرمایہ کاری، توانائی، انفراسٹرکچر، آئی ٹی، ٹیکنالوجی اور عوامی روابط کے فروغ کی اہمیت پر زور دیا۔ اس کے علاوہ دوطرفہ تجارت میں اضافے پر اتفاق کیا گیا، جس میں دونوں ممالک کے لیے نمایاں امکانات موجود ہیں۔
رہنماؤں نے علاقائی اور عالمی امور پر بھی خیالات کا تبادلہ کیا اور باہمی دلچسپی کے معاملات پر قریبی رابطہ برقرار رکھنے کے عزم کا اعادہ کیا۔
دوطرفہ تعلقات کی مثبت سمت پر اطمینان کا اظہار کرتے ہوئے، دونوں رہنماؤں نے پاکستان اور متحدہ عرب امارات کے درمیان اسٹریٹجک شراکت داری کو مزید مضبوط بنانے کے لیے مل کر کام جاری رکھنے کے عزم کا اظہار کیا۔
