پاکستان نے برطانوی ڈپٹی ہیڈ آف مشن کو طلب کر کے بریڈفورڈ میں احتجاج پر ڈیمارش جاری کیا

اسلام آباد: پاکستان کی وزارت خارجہ نے برطانیہ کے ڈپٹی ہیڈ آف مشن میٹ کینل کو طلب کر کے برطانیہ میں پیش آنے والے ایک احتجاج پر شدید احتجاج ریکارڈ کرایا۔
ذرائع کے مطابق برطانوی ہائی کمشنر جین میریٹ ملک میں موجود نہیں تھیں، جس کے باعث وزارت خارجہ نے قائم مقام ہائی کمشنر کو ڈیمارش جاری کیا۔ یہ احتجاج برطانیہ کے شہر بریڈفورڈ میں پاکستانی قونصلیٹ کے باہر ہوا، جس میں ایک سیاسی جماعت کے آفیشل اکاؤنٹ کے ذریعے مظاہرین کو جمع کیا گیا۔
احتجاج کے دوران مظاہرین نے چیف آف ڈیفنس فورسز کے خلاف انتہائی اشتعال انگیز اور قابل اعتراض زبان استعمال کی اور فیلڈ مارشل کو کار بم دھماکے میں قتل کرنے کی دھمکیاں دی گئیں۔
پاکستانی حکومت نے برطانیہ کی سرزمین سے دی گئی ان دھمکیوں کا سخت نوٹس لیا اور زور دیا کہ برطانیہ اپنی زمین کو پاکستان کے خلاف استعمال نہ ہونے دے۔ ترجمان دفتر خارجہ طاہر حسین نے بھی برطانوی قائم مقام ہیڈ آف مشن کو ڈیمارش جاری کرنے کی تصدیق کی اور توقع ظاہر کی کہ برطانیہ ایسے شرپسند عناصر کے خلاف سخت کارروائی کرے گا۔