اسلام آباد: وزیراعظم شہباز شریف اور سعودی ولی عہد و وزیراعظم شہزادہ محمد بن سلمان کے درمیان بدھ کو ایک اہم ٹیلیفونک رابطہ ہوا، جس میں دونوں رہنماؤں نے خطے کی مجموعی صورتحال اور پاک-سعودی برادرانہ تعلقات کو مزید مضبوط بنانے پر تفصیلی گفتگو کی۔ وزیراعظم آفس کے مطابق، وزیراعظم شہباز شریف نے مسلم امہ کو درپیش موجودہ چیلنجز سے نمٹنے کے لیے اتحاد اور ہم آہنگی کی اہمیت پر زور دیا۔ انہوں نے سعودی عرب کے ساتھ مکمل یکجہتی کا اظہار کرتے ہوئے کہا کہ علاقائی امن و سلامتی کے لیے سفارت کاری اور مذاکرات کا راستہ اختیار کرنا ناگزیر ہے۔
سعودی ولی عہد شہزادہ محمد بن سلمان نے ٹیلی فون کرنے پر وزیراعظم کا شکریہ ادا کیا اور پاکستان کے ساتھ باہمی دلچسپی کے تمام شعبوں میں تعاون بڑھانے کی خواہش کا اعادہ کیا۔ انہوں نے اگلے سال پاکستان کا باضابطہ سرکاری دورہ کرنے کی خواہش کا بھی اظہار کیا۔ دونوں رہنماؤں نے اس بات پر اتفاق کیا کہ حالیہ مہینوں میں پاکستان اور سعودی عرب کے درمیان برادرانہ تعلقات نئی بلندیوں تک پہنچے ہیں۔ گفتگو کے اختتام پر دونوں ملکوں کے سربراہان نے دیرینہ تعلقات کو مزید مستحکم کرنے کے مشترکہ عزم کو دہرایا۔
