آئی  جی اسلام آباد کی زیرِ صدارت 6 گھنٹے طویل آپریشنل کمانڈرز کانفرنس شہریوں کی جان و مال کا تحفظ، جرائم کے خاتمے اور جدید ٹیکنالوجی کے استعمال پر زور

اسلام آباد (عباس احمد )انسپکٹر جنرل آف پولیس اسلام آباد سید علی ناصر رضوی کی زیرِ صدارت رات گئے 6 گھنٹے طویل آپریشنل کمانڈرز کانفرنس منعقد ہوئی، جس میں وفاقی دارالحکومت کی مجموعی سکیورٹی صورتحال، پولیس کی کارکردگی، جرائم کی روک تھام، جدید ٹیکنالوجی کے استعمال اور عوامی سہولیات سے متعلق جاری منصوبوں کا تفصیلی جائزہ لیا گیا۔کانفرنس میں تمام ڈی آئی جیز، اے آئی جیز اور ایس ایس پیز نے شرکت کی اور آئی جی اسلام آباد کو اپنے اپنے ڈویژنز کی کارکردگی رپورٹس پیش کرتے ہوئے تفصیلی بریفنگ دی۔اس موقع پر آئی جی اسلام آباد سید علی ناصر رضوی نے واضح ہدایات جاری کرتے ہوئے کہا کہ شہریوں کی خدمت اور قانون کا مؤثر نفاذ اسلام آباد پولیس کی اولین ترجیح ہے۔ انہوں نے شہر بھر میں پتنگ فروشی اور پتنگ بازی میں ملوث عناصر کے خلاف بلا امتیاز سخت قانونی کارروائیوں کی ہدایت دیتے ہوئے کہا کہ شہریوں کی جانوں سے کھیلنے والوں کو کسی صورت معاف نہیں کیا جائے گا۔آئی جی اسلام آباد نے تمام افسران کو جرائم پیشہ عناصر کے خلاف کارروائیاں مزید تیز کرنے، وفاقی دارالحکومت میں “نشہ اب نہیں” مہم کے دائرہ کار کو وسیع کرنے اور منشیات کے خاتمے کیلئے مربوط حکمت عملی اپنانے کی ہدایت کی۔انہوں نے شہریوں کی سہولت کیلئے زیادہ سے زیادہ آن لائن پولیس سروسز فراہم کرنے، آرٹیفیشل انٹیلیجنس اور انفارمیشن ٹیکنالوجی کے شعبے میں مزید جدت لانے پر زور دیا۔ اس کے ساتھ ساتھ سیف سٹی اسلام آباد کے دائرہ کار کو جدید ٹیکنالوجی کے حصول کے ذریعے مزید وسعت دینے کی بھی ہدایت کی گئی۔آئی جی اسلام آباد سید علی ناصر رضوی نے پولیس افسران اور جوانوں کی استعداد کار بڑھانے کیلئے ٹریننگ سسٹم کو مزید مؤثر بنانے، ٹیم ورک کو مضبوط کرنے اور ماتحت عملے کے ساتھ بہتر ہم آہنگی یقینی بنانے کی ہدایت کی۔کانفرنس کے اختتام پر آئی جی اسلام آباد نے کہا کہ اسلام آباد پولیس وفاقی دارالحکومت میں امن و امان، سکیورٹی صورتحال اور شہریوں کی جان و مال کے تحفظ کو ہر ممکن یقینی بنائے گی۔ انہوں نے تمام کمانڈرز کو سخت محکمانہ احتساب کے ساتھ ساتھ پولیس افسران و جوانوں کی ویلفیئر کا خصوصی خیال رکھنے اور روزانہ کی بنیاد پر بریفنگ دینے کی ہدایت بھی جاری کی۔