عمران خان کے بیٹوں کو پاکستان کا ویزا نہ مل سکا، تکنیکی خامیوں کی وجہ سامنے آئی

اسلام آباد (9 فروری 2026) — پاکستان تحریک انصاف کے بانی اور سابق وزیراعظم عمران خان کے دو بیٹوں قاسم خان اور سلیمان خان کو لندن میں پاکستانی ہائی کمیشن سے ویزا حاصل نہیں ہو سکا۔
رپورٹ کے مطابق دونوں نے گزشتہ ماہ ویزا کے لیے درخواست دی تھی، لیکن درخواستوں میں تکنیکی خامیوں کی وجہ سے ویزا جاری نہیں کیا گیا۔ لندن سے سفارتی ذرائع نے ’دی نیوز‘ کو بتایا کہ دونوں کی ویزا درخواستیں اسلام آباد میں وزارت داخلہ کے متعلقہ سیکشن میں زیر التوا ہیں۔
ذرائع کے مطابق درخواست گزاروں سے خامیوں کو دور کرنے کے لیے رابطہ کیا گیا تھا، تاہم انہوں نے مطلوبہ معلومات فراہم کرنے میں دلچسپی نہیں دکھائی اور ضروری دستاویزات مکمل نہیں کیں۔
مزید تفصیلات میں بتایا گیا ہے کہ دونوں برطانوی پاسپورٹ ہولڈرز نے اپنی جائے پیدائش لندن درج کی ہے اور درخواستوں میں پاکستان سے کسی قسم کا تعلق (جیسے خاندانی روابط یا دیگر) واضح طور پر ظاہر نہیں کیا گیا۔ اس کے علاوہ انہوں نے سفری تاریخ بھی درست اور مکمل طور پر فراہم نہیں کی، جس کی وجہ سے درخواستوں پر کارروائی نہیں ہو سکی۔
دریں اثنا عمران خان کے بیٹوں نے الزام عائد کیا ہے کہ حکومت جان بوجھ کر ویزوں کی منظوری میں تاخیر کر رہی ہے تاکہ وہ اپنے والد سے ملاقات نہ کر سکیں۔ دوسری جانب حکومتی ذرائع کا کہنا ہے کہ معاملہ محض تکنیکی نوعیت کا ہے اور کوئی سیاسی فیصلہ نہیں۔
یہ معاملہ اس وقت سامنے آیا جب عمران خان کی صحت اور جیل میں ملاقاتوں کے حوالے سے خدشات کا اظہار کیا جا رہا ہے۔