پی ٹی آئی میں اندرونی کشیدگی، علیمہ خان کے انٹرویو پر شاندانہ گلزار کا تند و تیز ردعمل

اسلام آباد (نمائندہ خصوصی) — پاکستان تحریک انصاف کے اندرونی اختلافات ایک بار پھر سطح پر آ گئے جب رکن قومی اسمبلی شاندانہ گلزار نے علیمہ خان کے حالیہ انٹرویو پر سخت ردعمل دیتے ہوئے پارٹی کے واٹس ایپ گروپ میں ایک متنازع پیغام ارسال کیا۔
شاندانہ گلزار نے بغیر کسی کا نام لیے لکھا کہ وہ ایسے بیانات دیکھ رہی ہیں جن کا سبب صدمہ، بڑھاپا اور شدید ذہنی دباؤ ہے۔ انہوں نے یہاں تک کہا کہ ایسی خواتین کو اس عمر میں سیاست کے بجائے گھر پر پوتے پوتیوں کے ساتھ ہونا چاہیے۔
سیاسی حلقوں میں یہ پیغام علیمہ خان کی جانب اشارہ سمجھا جا رہا ہے جنہوں نے حال ہی میں ایک انٹرویو میں پارٹی کے داخلی معاملات پر کھل کر گفتگو کی تھی۔ تاہم شاندانہ گلزار نے اپنے پیغام میں کسی کا براہ راست نام نہیں لیا۔
یہ واقعہ ایسے وقت میں سامنے آیا ہے جب پی ٹی آئی پہلے سے متعدد اندرونی اور بیرونی چیلنجز سے دوچار ہے۔ تجزیہ کاروں کا کہنا ہے کہ پارٹی قیادت کے اندر اس طرح کی عوامی چپقلش پی ٹی آئی کی صفوں میں بڑھتی ہوئی بے اطمینانی اور خلفشار کی عکاسی کرتی ہے۔
پارٹی کی جانب سے ابھی تک اس معاملے پر کوئی باضابطہ موقف سامنے نہیں آیا۔