پاکستان اور جرمنی نے موسمیاتی تبدیلی کے شعبے میں اپنے دوطرفہ تعاون کو مزید وسعت دینے کا عزم ظاہر کیا ہے۔ اس سلسلے میں جرمنی کی سفیر اِنا لیپل نے وفاقی وزیر برائے موسمیاتی تبدیلی اور ماحولیاتی ہم آہنگی ڈاکٹر مصدق ملک سے ملاقات کی۔
ملاقات کے دوران جرمن سفیر نے وزارت کی جانب سے موسمیاتی اقدامات کو آگے بڑھانے اور صوبوں کے ساتھ ہم آہنگی میں مسلسل تعاون پر شکریہ ادا کیا۔ انہوں نے وزیر کو آگاہ کیا کہ جرمن ترقیاتی ادارے جی آئی زیڈ کے ذریعے پاکستان کی وزارت موسمیاتی تبدیلی کے ساتھ متعدد شعبوں میں تعاون جاری ہے جن میں موسمیاتی موافقت اور لچک، اخراج کنٹرول حکمت عملی، صلاحیت سازی، سبز اقدامات اور پائلٹ منصوبوں کی تیاری شامل ہیں۔
سفیر لیپل نے اس موقع پر وزارت موسمیاتی تبدیلی کے ساتھ زیرغور ایک اہم منصوبے سی آئی ایس ٹی اے (CISTA — مربوط موسمیاتی معلوماتی خدمات برائے تبدیلی آفریں موسمیاتی عمل) سے بھی آگاہ کیا۔ یہ منصوبہ جرمن وفاقی وزارت برائے ماحولیات کے زیراہتمام شروع کیا جا رہا ہے اور اس کا بنیادی مقصد پاکستان میں مربوط موسمیاتی معلوماتی خدمات کا قیام اور ڈیٹا مینجمنٹ کے نظام کو جدید خطوط پر استوار کرنا ہے تاکہ شواہد پر مبنی فیصلہ سازی کو یقینی بنایا جا سکے۔
ڈاکٹر مصدق ملک نے پاکستان کے موسمیاتی ایجنڈے کو آگے بڑھانے میں جرمنی کی مسلسل شراکت داری اور تعاون کو سراہا۔ انہوں نے سی آئی ایس ٹی اے منصوبے کا خیرمقدم کرتے ہوئے تجویز پیش کی کہ اس منصوبے کے مؤثر نفاذ کو یقینی بنانے کے لیے ڈیٹا انضمام اور معلومات کے تبادلے پر ایک مشترکہ ورکشاپ کا انعقاد کیا جائے۔
دونوں فریقوں نے دوطرفہ تعاون کے دائرے کو مزید وسعت دینے کے طریقوں پر بھی تبادلہ خیال کیا جن میں مشترکہ تحقیقی پروگراموں کی تیاری، طلباء اور اساتذہ کے تبادلے کے اقدامات اور ڈیٹا شیئرنگ اور ادارہ جاتی تعاون کے لیے مضبوط میکانزم کی تشکیل شامل ہیں۔
واضح رہے کہ پاکستان دنیا کے ان ممالک میں شامل ہے جو موسمیاتی تبدیلی کے اثرات سے سب سے زیادہ متاثر ہیں۔ 2022 کے تباہ کن سیلاب نے ملک کے ایک تہائی حصے کو ڈبو دیا تھا جس سے اس شعبے میں بین الاقوامی تعاون کی اہمیت مزید اجاگر ہوئی ہے۔ جرمنی کے ساتھ یہ بڑھتی ہوئی شراکت داری پاکستان کی موسمیاتی لچک کو مضبوط بنانے کی سمت ایک اہم قدم تصور کی جا رہی ہے۔
