ایران کا دعویٰ: امریکی حملوں کی تیاری کرنے والے 120 سے زائد افراد گرفتار

تہران : ایران کی پاسداران انقلاب (آئی آر جی سی) نے ملک بھر میں کارروائی کرتے ہوئے 120 سے زائد افراد کو گرفتار کرنے کا دعویٰ کیا ہے۔ ایرانی نیم سرکاری میڈیا کے مطابق گرفتار افراد امریکا، برطانیہ اور اسرائیل سے وابستہ تھے اور وہ "دشمن کے فوجی حملے کے لیے زمینیں ہموار” کر رہے تھے۔
تسنیم نیوز ایجنسی کی رپورٹ کے مطابق یہ گرفتاریاں مختلف صوبوں میں کی گئیں۔ مشرقی آذربائیجان میں 7 مشتبہ افراد کو ہتھیاروں کی تیاری، تخریب کاری اور حساس مقامات کے کوآرڈینیٹس بیرون ملک بھیجنے کے الزام میں گرفتار کیا گیا۔ مازندران صوبے میں 69 اور کرمان صوبے میں 51 افراد سمیت تین "جاسوسی ٹیموں” کو بھی پکڑا گیا۔
ایرانی حکام کا کہنا ہے کہ یہ افراد حساس تنصیبات کی معلومات اکٹھا کر رہے تھے اور ممکنہ فوجی کارروائی میں سہولت فراہم کرنے کی منصوبہ بندی کر رہے تھے۔
یہ گرفتاریاں ایران اور امریکہ-اسرائیل کے درمیان جاری کشیدگی کے تناظر میں سامنے آئی ہیں۔ ایران نے اسے قومی سلامتی کی حفاظت کا اقدام قرار دیا ہے جبکہ بین الاقوامی سطح پر ایسے دعووں پر اکثر شکوک و شبہات کا اظہار کیا جاتا ہے۔