کولمبیا: ابیلاردو ڈی لا ایسپریلا نے صدر کا حلف اٹھا لیا

کالی، کولمبیا: وکیل اور سیاسی میدان میں نسبتاً نئے رہنما ابیلاردو ڈی لا ایسپریلا نے جمعہ کو کولمبیا کے صدر کی حیثیت سے حلف اٹھا لیا۔ حلف برداری کی تقریب دارالحکومت بوگوٹا کے بجائے جنوب مغربی شہر کالی کی یونیورسٹیڈاد سینٹیاگو ڈی کالی کے ایرینا یو ایس سی میں منعقد ہوئی۔
یہ فیصلہ کولمبیا میں ایک صدی سے زیادہ عرصے سے جاری روایتی حلف برداری سے انحراف کی علامت ہے۔ ڈی لا ایسپریلا نے سبکدوش صدر گستاو پیٹرو کی جگہ سنبھالی ہے، جن کی چار سالہ مدت معاشی مشکلات اور سیاسی کشیدگی کے دوران مکمل ہوئی۔
روایتی طور پر صدر کی حلف برداری بوگوٹا کے تاریخی پلازا ڈی بولیوار میں ہوتی رہی ہے، تاہم آنے والی اور سبکدوش انتظامیہ کے درمیان کئی ہفتوں تک جاری رہنے والے ادارہ جاتی اختلافات کے بعد تقریب کا مقام تبدیل کردیا گیا۔
ڈی لا ایسپریلا نے ابتدا میں مسلح افواج کو خراج تحسین پیش کرنے کے لیے ایک فوجی اڈے پر حلف برداری کی تجویز دی تھی۔ صدر پیٹرو نے اس تجویز کی مخالفت کرتے ہوئے مؤقف اختیار کیا کہ جب تک وہ کمانڈر اِن چیف ہیں، فوجی اڈوں کو سیاسی افتتاحی تقریبات کے لیے استعمال نہیں کیا جانا چاہیے۔
کانگریس کی منظوری کے بعد ڈی لا ایسپریلا نے صوبہ والے ڈیل کاؤکا کے دارالحکومت کالی کا انتخاب کیا۔ انہوں نے اس فیصلے کو انتظامی مرکزیت کم کرنے اور علاقائی سلامتی سے وابستگی کے اظہار کے طور پر پیش کیا۔ حلف برداری کے فوراً بعد انہوں نے صدر کی حیثیت سے اپنا پہلا سرکاری دورہ کالی کے مارکو فیڈل سواریز ایئر فورس بیس کا کیا۔
تقریب میں امریکہ اور یورپ سمیت مختلف ممالک کے قدامت پسند رہنماؤں نے شرکت کی۔ شرکا میں اسپین کے بادشاہ فلپ ششم، ارجنٹائن کے صدر جیویر میلی، ایکواڈور کے صدر ڈینیئل نوبوا، پیراگوئے کے صدر سینتیاگو پینا، کوسٹا ریکا کی منتخب صدر لورا فرنانڈیز، پاناما کے صدر خوسے راؤل مولینو، ڈومینیکن ریپبلک کے صدر لوئس ابینادر اور امریکی قائم مقام اٹارنی جنرل ٹوڈ بلانچ شامل تھے۔
سابق صدر گستاو پیٹرو تقریب میں شریک نہیں ہوئے، جبکہ ان کے سیاسی اتحاد ’’پیکٹو ہسٹوریکو‘‘ سے وابستہ قانون سازوں نے بھی تقریب کا بائیکاٹ کیا۔ کالی سمیت ملک کے کئی بڑے شہروں میں احتجاجی مظاہرے بھی کیے گئے۔