سابق اسپیکر قومی اسمبلی و سیکرٹری جنرل تحریک تحفظ آئین پاکستان اسد قیصر نے کہا ہے کہ آج سیاست دانوں کی کوئی عزت نہیں مگر میں نے تمام سیاسی جماعتوں کو ایک جگہ پر جمع کرلیا ہے، 27 ستمبر کو لانگ مارچ میں دیگر سیاسی جماعتیں بھی شامل ہوں گی۔
خیبرپختونخوا کے ضلع صوابی کی تحصیل بام خیل میں کمیونٹی سینٹر کی افتتاحی تقریب سے خطاب کرتے ہوئے اسد قیصر نے کہا کہ میں نے تمام سیاسی جماعتوں کو اکٹھا کیا ہے جبکہ اس وقت کسی سیاست دان کی عزت نہیں رہی۔
انہوں نے کہا کہ امن و امان اس وقت ملک کا سب سے بڑا مسئلہ ہے اور خیبر پختونخوا میں وفاقی حکومت کی ناقص پالیسیوں کی وجہ سے بدامنی ہے۔ ان کا کہنا تھا کہ عوام محسوس کر رہے ہیں کہ انہیں اکیلا چھوڑ دیا گیا ہے، جبکہ بلوچستان اور آزاد کشمیر کی صورتِ حال بھی سب کے سامنے ہے۔
اسد قیصر نے کہا کہ ایسی صورتِ حال میں ملک کیسے چلے گا، یہ ایک اہم سوال ہے، موجودہ اسمبلی میں عوام کے لیے کوئی ایک قانون بھی نہیں بنایا گیا۔ انہوں نے بتایا کہ 27 ستمبر کو لانگ مارچ کا اعلان کیا گیا ہے اور تمام سیاسی جماعتوں کو ساتھ ملایا جائے گا۔
انہوں نے کہا کہ اگر عوام آزاد عدلیہ، مضبوط پارلیمنٹ، مہنگائی کا خاتمہ اور خودمختار پاکستان چاہتے ہیں تو انہیں اٹھنا ہوگا۔اسد قیصر کا کہنا تھا کہ پاکستان ہمارا ہے اور ہم کسی سے بھیک نہیں مانگتے، ہمیں پاکستانی کی حیثیت سے باعزت زندگی گزارنی ہے۔ کسی کے پاس یہ اختیار نہیں کہ وہ ہمیں ڈکٹیشن دے یا ہمارے فیصلے کرے۔
اسد قیصر نے مزید کہا کہ پاکستان کے فیصلے اس ملک کے عوام کریں گے۔ انہوں نے کہا کہ وہ دن دور نہیں جب عمران خان جیل سے نکلے گا۔ ان کا کہنا تھا کہ سپریم کورٹ کا واضح فیصلہ تھا، لیکن اسے نہیں مانا گیا
