پمز سانحے کے متاثرین کے ساتھ ہمدردی سے پیش آئیں! شوبز شخصیات کی مصطفیٰ کمال پر تنقید
شوبز شخصیات نے وزیر صحت مصطفیٰ کمال کے رویے پر سوال اٹھا دیے
-
ویب ڈیسک -
اسلام آباد کے پمز اسپتال کی نرسری میں پیش آنے والے افسوسناک واقعے کے بعد متاثرہ خاندانوں کے ساتھ مبینہ سخت رویے پر شوبز انڈسٹری کی معروف شخصیات نے وفاقی وزیر صحت مصطفیٰ کمال کو تنقید کا نشانہ بنایا ہے۔
پمز اسپتال میں پیش آنے والے سانحے نے ملک بھر میں غم و غصے کی لہر پیدا کردی ہے جبکہ متاثرہ خاندان اپنے بچوں کی ہلاکت پر شدید صدمے سے دوچار ہیں۔
واقعے کے بعد وفاقی وزیر صحت مصطفیٰ کمال نے پمز اسپتال کا دورہ کیا جہاں متاثرہ خاندانوں کی جانب سے مختلف سوالات کیے گئے۔ سوشل میڈیا پر گردش کرنے والی ویڈیوز میں وزیر صحت کے بعض بیانات اور متاثرین سے گفتگو کے انداز پر بھی بحث جاری ہے۔
شوبز شخصیات نے مصطفیٰ کمال کے مبینہ رویے پر ردعمل دیتے ہوئے کہا کہ ایسے سانحے کے متاثرین کے ساتھ ہمدردی اور حساسیت کا مظاہرہ کیا جانا چاہیے۔
اداکارہ بشریٰ انصاری نے اپنے ردعمل میں کہا کہ حکام کو یہ سمجھنا چاہیے کہ متاثرہ خاندان کس کرب سے گزر رہے ہیں اور ان کے سوالات کا تحمل سے جواب دینا ذمہ داروں کا فرض ہے۔
سیمی راحیل نے بھی متاثرہ خاندانوں کے ساتھ ہمدردی اور ذمہ داری کے مظاہرے کی ضرورت پر زور دیا اور وزیر صحت کے رویے پر سوالات اٹھائے۔
اداکار عمران عباس اور سحر ہاشمی نے بھی سانحے کے متاثرین کے ساتھ مبینہ ناروا سلوک پر افسوس کا اظہار کیا اور حکام سے حساسیت کے ساتھ معاملہ کرنے کا مطالبہ کیا۔
شوبز شخصیات کا کہنا ہے کہ پمز سانحہ ایک انتہائی افسوسناک واقعہ ہے جس کے ذمہ داروں کا تعین کرکے شفاف تحقیقات اور احتساب کو یقینی بنایا جانا چاہیے۔
