"اسرائیل غزہ میں نسل کشی کا مرتکب ہو رہا ہے”: ہسپانوی وزیراعظم کا اقوام متحدہ میں خطاب

نیویارک، — ہسپانوی وزیراعظم پیڈرو سانچیز نے جمعرات کو اقوام متحدہ کی جنرل اسمبلی کے 81ویں اجلاس سے خطاب کرتے ہوئے غزہ کی پٹی پر مسلط کردہ جنگ کے تناظر میں اسرائیل پر شدید تنقید کی اور بنجامن نیتن یاہو کی حکومت پر نسل کشی کا سلسلہ جاری رکھنے کا الزام عائد کیا۔ انہوں نے کہا کہ ان کی حکومت غزہ میں جاری اس عمل کی غیر مشروط مذمت کرتی ہے۔
سانچیز نے غزہ میں فلسطینیوں کے خلاف اسرائیلی فوجی کارروائیوں کو نسل کشی قرار دیا اور جنگوں و بحرانوں کے معاملے میں بین الاقوامی سطح پر اپنائے جانے والے دوہرے معیار پر بھی تنقید کی۔ انہوں نے کہا کہ دنیا میں موجود "خود غرض، جاہل اور سنگ دل” طاقتیں غیر قانونی جنگیں لڑ رہی ہیں، بے گناہ شہریوں کو قتل کر رہی ہیں اور لاکھوں انسانوں کے مصائب سے صرفِ نظر کرتے ہوئے اقوام متحدہ اور کثیر جہتی نظام کو کمزور کر رہی ہیں۔
ہسپانوی وزیراعظم نے یوکرین، لبنان اور ایران کی مثالیں دیتے ہوئے کہا کہ اسپین نے گزشتہ 8 برسوں کے دوران جارحانہ جنگوں کی مخالفت کی ہے کیونکہ یہ کارروائیاں اقوام متحدہ کے چارٹر سے متصادم ہیں۔ انہوں نے بین الاقوامی قانون کی حکمرانی، اقوام متحدہ اور بین الاقوامی عدالتی اداروں کی پشت پناہی، اور خلاف ورزیوں کے ذمہ داروں کے احتساب پر زور دیا۔