اسپین: تیز رفتار ریل پر اعتماد ٹوٹ گیا: ریل حادثے کے بعد ہسپانوی وزیراعظم کا بیان

میڈرڈ: اسپین کے وزیر اعظم پیڈرو سانچیز نے ریل حادثے پر افسوس کا اظہار کرتے ہوئے کہا کہ تیز رفتار ریل پر اعتماد ٹوٹ گیا، بدھ کو ہوئے اس حادثے میں کم از کم ۶۹ افراد ہلاک ہوئے، جو اس سال اسپین میں دوسرا بڑا تیز رفتار ریل سانحہ ہے۔
ہسپانوی وزیر اعظم پیڈرو سانچیز نے جمعہ کو تسلیم کیا کہ اس ہفتے کے شروع میں ایک مہلک حادثے میں کم از کم ۶۹ افراد کی ہلاکت اور ۱۱۰ کے زخمی ہونے کے بعد ’’تیز رفتار ریل پر اعتماد ٹوٹ گیا ہے۔‘‘ واضح رہے کہ وسطی اسپین میں اوردا کے قریب بدھ کو ہونے والا تصادم اس سال ملک کا دوسرا بڑا تیز رفتار ریل حادثہ تھا۔ جبکہ جنوری میں اداموز قصبے کے قریب پٹری سے اترنے اور تصادم میں ۴۶ افراد ہلاک ہوئے تھے، جس کی ابتدائی تحقیقات میں پٹری ٹوٹنے کی نشاندہی کی گئی تھی۔ سانچیز نے ایک پریس کانفرنس میں کہا، ’’اسپین جیسے ملک کے لیے، جس کا تیز رفتار ریل نظام اتنا مضبوط ہے، ایک سال میں اس نوعیت اور شدت کے دو حادثات کا شکار ہونا ناقابل قبول ہے۔‘‘ بعد ازاں انہوں نے ’’تیز رفتار ریل نظام کو مزید مضبوط بنانے کے لیے حل فراہم کرنے کا عہد کیا تاکہ اس قسم کا المیہ دوبارہ نہ ہو۔‘‘
انٹرنیشنل یونین آف ریلوے کے مطابق، اسپین کے پاس چین کے بعد دنیا کا دوسرا سب سے بڑا تیز رفتار ریل نیٹ ورک اور یورپ میں سب سے بڑا نیٹ ورک ہے۔ کاسٹیل لا منچا کے علاقائی صدر ایمیلیانو گارسیا پیج نے جمعہ کو کہا کہ شناخت کا کام جاری رہنے کے باعث ہلاکتوں کی تعداد میں معمولی اضافہ ہو سکتا ہے۔ جبکہ حکام کو ۷۰ لاپتہ افراد کی رپورٹیں موصول ہوئی تھیں۔ انہوں نے بتایا کہ خطے میں اسپتال میں داخل ۱۱۰ افراد میں سے ۳۹ اب بھی داخل ہیں، جن کی حالت کافی بہتر ہے۔
خامیوں کی جانچ جاری
ان خامیوں پر جانچ بڑھ رہی ہے جن کی وجہ سے رینفے کی تیز رفتار ٹرین میڈرڈ-سیویل لائن پر کھڑی ایریو ٹرین کے پیچھے جا ٹکرائی۔ وزیر ٹرانسپورٹ آسکر پونٹے نے کہا کہ خودکار سگنلنگ سسٹم میں تکنیکی خرابی کی وجہ سے کئی ٹرینیں رک گئیں، جس کے بعد میڈرڈ میں کنٹرولرز کو کنٹرول سنبھالنا پڑا۔ پونٹے نے جمعہ کو کہا کہ اسی طرح کی خرابیاں اس سال اسپین میں ۱۶۰ بار ہو چکی ہیں، انہوں نے مزید کہا کہ یہ تعداد یورپی یونین کے معیار کے مطابق ہے۔ پونٹے کے مطابق کنٹرول سینٹر کے ایک کارکن نے پھر رینفے ٹرین کو آگے کھڑی ٹرین ہونے کے باوجود معمول کی رفتار سے، یعنی ۲۰۰ کلومیٹر فی گھنٹہ تک چلنے کی اجازت دے دی، جو حفاظتی اصولوں کی خلاف ورزی تھی۔ پونٹے نے کہا، ’’اگر ایک ہی بلاک سیکشن میں دو ٹرینیں ہوں تو پیچھے والی ٹرین کو نہیں چلنا چاہیے۔ دوسرا، ان حالات میں، اگر پہلی ٹرین چلتی ہے تو ٹرین کو زیادہ سے زیادہ ۴۰ کلومیٹر فی گھنٹہ کی رفتار سے چلنے کی اجازت ہونی چاہیے۔ جبکہ حادثے سے تقریباً پانچ منٹ پہلے، کھڑی ٹرین نے بھی کنٹرول سینٹر سے رابطہ کر کے خبردار کیا تھا کہ وہ دوبارہ چلنے سے قاصر ہے۔ ابتدائی تحقیقات کے مطابق رینفے ٹرین جب کھڑی ٹرین سے ٹکرائی تو اس کی رفتار تقریباً ۱۶۰ سے ۲۰۰ کلومیٹر فی گھنٹہ تھی۔ تاہم تحقیقات نے حتمی ذمہ داری کا تعین نہیں کیا ہے، اور ریلوے کارکنوں اور ماہرین نے سوال اٹھایا ہے کہ آیا کنٹرولر کا فیصلہ، جسے پونٹے نے ’’ناقابل فہم‘‘ قرار دیا، وسیع تر کمزوریوں کی عکاسی کرتا ہے۔
ہسپانوی خبر رساں ایجنسی EFE نے رپورٹ کیا کہ یو جی ٹی یونین سے تعلق رکھنے والے رینفے ٹرین ڈرائیور ویسینٹے المینار نے احتیاط کی اپیل کی، اور تاخیر سے بچنے کے لیے آپریشن تیز کرنے کے شدید دباؤ سے خبردار کیا۔ Adif میں UGT کے حفاظتی نمائندے انتونیو توبال نے صرف انسانی غلطی پر توجہ مرکوز کرنے کے خلاف خبردار کیا۔ انہوں نے کام کے حالات، تنظیمی طریقہ کار اور ہنگامی حالات کے لیے عملے کی تربیت کا جائزہ لینے کا مطالبہ کیا۔
دیگر ماہرین نے اسپین کی تیز رفتار ریل کی تیزی سے توسیع اور دیگر یورپی ممالک کے مقابلے میں نسبتاً کم دیکھ بھال کے اخراجات کی طرف اشارہ کیا ہے۔ انہوں نے میڈرڈ-سیویل لائن کے پرانے خودکار سگنلنگ سسٹم کو یورپی ریل ٹریفک مینجمنٹ سسٹم سے تبدیل کرنے میں تاخیر پر بھی سوال اٹھایا ہے۔
اسپین کا ریل سیفٹی ریکارڈ
اسپین کے حادثات دیگر جگہوں پر تیز رفتار ریل کے مضبوط حفاظتی ریکارڈ کے برعکس ہیں۔ جاپان کی شنکانسن نے ۱۹۶۴ء میں خدمات شروع ہونے کے بعد سے تصادم یا پٹری سے اترنے سے مسافروں کی کوئی ہلاکت درج نہیں کی ہے۔ جبکہ چین کے دو دستاویزی مہلک تیز رفتار حادثات میں ۴۱ افراد ہلاک ہوئے۔ اس کے علاوہ فرانس، جس کے پاس یورپ کا دوسرا سب سے بڑا تیز رفتار نیٹ ورک ہے، نے تین حادثات میں ۱۴ ہلاکتیں درج کی ہیں، جن میں ایک ٹیسٹ رن کے دوران ۱۱ ہلاکتیں بھی شامل ہیں۔ جبکہ اسپین کے اس سال کے دو حادثات میں کم از کم ۱۱۵ افراد ہلاک ہو چکے ہیں۔ ۲۰۱۳ء میں سینٹیاگو ڈی کمپوسٹیلا میں پٹری سے اترنے سے مزید ۸۰ افراد ہلاک ہوئے تھے۔ دریں اثنا اسپین کے وزیر ٹرانسپورٹ نے مستعفی ہونے کے مطالبات کو مسترد کر دیا۔