نائب صدر وینس ٹرمپ کے ناراض حامیوں کے ساتھ نیا سیاسی اتحاد بنانے کے خواہاں: رپورٹ

واشنگٹن: فاکس نیوز ڈیجیٹل نے بدھ کو معاملے سے واقف ذرائع کے حوالے سے رپورٹ کیا ہے کہ امریکی نائب صدر جے ڈی وینس 2028 کے صدارتی انتخاب سے قبل صدر ڈونالڈ ٹرمپ کے ناراض حامیوں کے ساتھ ایک نیا سیاسی اتحاد بنانا چاہتے ہیں۔
رپورٹ کے مطابق 3 نومبر کے وسط مدتی انتخابات میں ریپبلکن کو نقصان پہنچنے کے بعد وینس نے اپنا سیاسی پیغام تشکیل دینا شروع کر دیا ہے، جس میں انہوں نے خارجہ پالیسی اور اسرائیل کے ساتھ واشنگٹن کے تعلقات پر ٹرمپ سے اختلاف کا اظہار بھی کیا ہے۔
ذرائع کے مطابق بدھ کی صبح وائٹ ہاؤس میں انتظامیہ کے عہدیداروں کے درمیان انتخابات کے بعد پیغام رسانی کو ہم آہنگ کرنے کے لیے اجلاس ہوا۔ اجلاس کے بعد وینس نے ایک پولسٹر کا حوالہ دیتے ہوئے ایکس پر ووٹروں کو واپس جیتنے کے چار اقدامات بیان کیے: ایران میں جنگ کا خاتمہ، زندگی گزارنے کی لاگت اور مہنگائی پر توجہ، امریکہ کو ترجیح دینا، اور اسرائیل کے ساتھ تعلقات میں تبدیلی۔ انہوں نے لکھا کہ صدر نے خود گزشتہ رات ایران جنگ کا حوالہ دیتے ہوئے کہا کہ ہارنے کی وجہ جنگ ہے۔
وائٹ ہاؤس کے ایک عہدیدار نے فاکس نیوز ڈیجیٹل کو بتایا کہ یہ چاروں نکات نئی دائیں بازو کے لیے وینس کی پکار ہیں، جو ٹرمپ کی اصل "امریکہ فرسٹ” تحریک سے منسلک ہے۔ اس حلقے کا ماننا ہے کہ ٹرمپ خارجہ پالیسی میں اسرائیل کے ساتھ بہت زیادہ جڑے ہوئے ہیں۔ عہدیدار کے مطابق وینس کا پیغام ٹرمپ سے علاحدگی نہیں بلکہ ان ریپبلکنز کے لیے ہے جو صدر کے حامی ہیں مگر ان کی خارجہ پالیسی سے اختلاف رکھتے ہیں یا خود کو دھوکہ کھایا ہوا محسوس کرتے ہیں۔ عہدیدار نے کہا، "وینس ہمارا آدمی ہے۔”