غزہ میں 68 ملین ٹن ملبہ ماحولیاتی اور انسانی تباہی کا باعث: فلسطینی اتھاریٹی

غزہ: فلسطینی ماحولیاتی معیار اتھاریٹی نے جنگ اور مسلح تنازع میں ماحول کے استحصال کی روک تھام کے عالمی دن کے موقع پر خبردار کیا ہے کہ غزہ میں جمع ہونے والا ملبہ ماحولیاتی اور انسانی تباہی کا سبب بن رہا ہے۔ اتھاریٹی کے مطابق اسرائیلی تباہی کے نتیجے میں غزہ بھر میں 61 سے 68 ملین ٹن ملبہ جمع ہو چکا ہے، جس میں تقریباً 4 ملین ٹن خطرناک فضلہ اور کم از کم 50 ہزار ٹن ایسبیسٹاس شامل ہے، جو سرطان پیدا کرنے والا ریشہ دار مواد ہے۔
اتھاریٹی کا کہنا ہے کہ جنگ نے غزہ کی 82 فیصد زرعی زمین، 97 فیصد زیتون اور دیگر پھلوں کے درخت اور 84 فیصد پانی و سیوریج کا بنیادی ڈھانچہ تباہ کر دیا ہے۔ صفائی کے نظام کی تباہی کے باعث روزانہ تقریباً 1 لاکھ 20 ہزار مکعب میٹر (31.7 ملین گیلن) غیر علاج شدہ گندا پانی گلیوں اور پانی کے طاسوں میں خارج ہو رہا ہے۔ اکتوبر 2023 سے جاری جنگ میں 74 ہزار سے زائد فلسطینی ہلاک اور 1 لاکھ 75 ہزار سے زیادہ زخمی ہو چکے ہیں۔
اتھاریٹی نے 2026 کے آغاز سے ستمبر کے آخر تک مقبوضہ مغربی کنارے میں 760 اسرائیلی ماحولیاتی حملے بھی دستاویزی شکل میں درج کیے۔ ان میں 203 حملے زرعی زمین اور قدرتی ذخائر کو نشانہ بنانے والے تھے، جن میں زیتون کے باغات کو بلڈوز کرنا، بستیوں کی سڑکوں کی تعمیر اور فلسطینی زمین پر قبضہ شامل ہے۔ مزید 178 حملے جنگلات اور نباتات پر ہوئے، جن میں ہزاروں درخت اکھاڑے گئے، ان میں تقریباً ایک لاکھ زیتون کے درخت بھی شامل ہیں، اور نقصان کا تخمینہ 67 ملین ڈالر ہے۔
اتھاریٹی نے فضلہ اور خطرناک ملبے سے متعلق 185 واقعات، غذائی تحفظ اور مویشیوں کو متاثر کرنے والے 52 حملے، پانی کے ذرائع اور کنوؤں کو نشانہ بنانے والے 37، پانی کی پائپ لائنوں اور آبپاشی نیٹ ورکس کو نشانہ بنانے والے 35 اور سیوریج سسٹم سے متعلق 5 واقعات بھی درج کیے۔ اس نے عالمی برادری سے مطالبہ کیا کہ خلاف ورزیاں روکنے کے لیے کارروائی کرے اور فلسطینیوں کو اپنے قدرتی وسائل پر کنٹرول اور تحفظ کا اختیار دلائے۔