کینبرا — آسٹریلوی وزیراعظم انتھونی البانیز نے اعلان کیا ہے کہ آسٹریلیا اقوام متحدہ کی جنرل اسمبلی کے آئندہ اجلاس میں فلسطین کو بطور ریاست تسلیم کرے گا۔
وزیراعظم البانیز کا کہنا ہے کہ یہ فیصلہ فلسطینی اتھارٹی کے وعدوں اور عزم پر مبنی ہوگا، تاہم انہوں نے واضح کیا کہ ایک آزاد فلسطینی ریاست میں حماس کے لیے کوئی مستقبل نہیں ہو سکتا۔ ان کے مطابق غزہ کی صورتِ حال دنیا کے بدترین خدشات سے بڑھ چکی ہے۔
انہوں نے بتایا کہ اس معاملے پر جاپان، برطانیہ، نیوزی لینڈ اور اسرائیل کے رہنماؤں سے بات چیت کی گئی ہے۔ اسرائیلی وزیراعظم نیتن یاہو سے گفتگو میں آسٹریلوی وزیراعظم نے زور دیا کہ مسئلے کا حل فوجی نہیں بلکہ سیاسی ہونا چاہیے۔
واضح رہے کہ نیوزی لینڈ کے وزیر خارجہ ونسٹن پیٹرز نے بھی کہا ہے کہ ان کی کابینہ ستمبر میں فلسطین کو بطور ریاست تسلیم کرنے پر فیصلہ کرے گی، جبکہ برطانیہ، پرتگال، جرمنی اور مالٹا اس سے قبل فلسطینی ریاست کے مشروط یا اشارتی اعتراف کا اعلان کر چکے ہیں۔
