اڈیالہ جیل میں ملاقات کے دوران بانی پی ٹی آئی نے فیصلے سے آگاہ کیا
پاکستان تحریک انصاف (پی ٹی آئی) کے بانی چیئرمین عمران خان نے قومی اسمبلی میں اپوزیشن لیڈر کے لیے پشتونخوا ملی عوامی پارٹی کے سربراہ محمود خان اچکزئی کو نامزد کر دیا ہے۔
پی ٹی آئی کے ذرائع کے مطابق عمران خان نے اپنی قانونی و سیاسی ٹیم کو اڈیالہ جیل میں ملاقات کے دوران اس فیصلے سے آگاہ کیا۔ پارٹی رہنماؤں نے بعد ازاں اس فیصلے کی تصدیق کرتے ہوئے کہا کہ عمران خان نے باضابطہ طور پر محمود خان اچکزئی کو اپوزیشن لیڈر نامزد کیا ہے۔
یاد رہے کہ عام انتخابات کے بعد قومی اسمبلی میں اپوزیشن لیڈر کی نامزدگی کے حوالے سے مشاورت جاری تھی۔ پی ٹی آئی اور اس کی اتحادی جماعتیں اس سلسلے میں متفقہ امیدوار پر غور کر رہی تھیں۔ ذرائع کا کہنا ہے کہ عمران خان نے اتحادیوں کے ساتھ مشاورت کے بعد محمود خان اچکزئی پر اعتماد کا اظہار کیا۔
سیاسی مبصرین کے مطابق محمود خان اچکزئی کو اپوزیشن لیڈر نامزد کرنا نہ صرف پارلیمانی سیاست میں ایک غیر روایتی فیصلہ ہے بلکہ اپوزیشن کی صفوں میں نئی صف بندی کا اشارہ بھی ہے۔ ان کا کہنا ہے کہ اس فیصلے سے اپوزیشن اتحاد مزید مضبوط ہوگا اور حکومت کے مقابلے میں مشترکہ مؤقف اپنانے میں آسانی پیدا ہوگی۔
