صحرائے صحارا میں المیہ: ٹرک خراب ہونے سے پھنسے 50 افراد پیاس سے جاں بحق

IMG 20260606 WA1500


نیامے (نائیجر) — 6 جون 2026
افریقی ملک نائیجر میں صحرائے صحارا کے بیچوں بیچ ایک دردناک انسانی المیہ پیش آیا جب ایک ٹرک خراب ہو جانے کے باعث پھنسے 50 افراد شدید گرمی میں پانی ختم ہو جانے سے پیاس کی تاب نہ لاتے ہوئے جاں بحق ہو گئے۔
غیر ملکی خبر ایجنسی کے مطابق ہلاک ہونے والے تمام افراد عیدالاضحیٰ کی تعطیلات کے بعد مالی سے واپس اپنے گھروں کو لوٹ رہے تھے کہ راستے میں صحرائے صحارا کے درمیان ان کا ٹرک خراب ہو گیا۔ ریت کے بے انت سمندر میں پھنسے ان مسافروں کے پاس موجود پانی کا ذخیرہ شدید گرمی میں جلد ختم ہو گیا اور وہ ایک ایک کر کے موت کے منہ میں چلے گئے۔
اس سانحے میں صرف دو افراد معجزانہ طور پر زندہ بچ سکے، جنہوں نے اپنی جان بچانے کے لیے پیدل صحرا عبور کیا اور کئی گھنٹوں کی جان لیوا مشقت کے بعد قریبی آبادی تک پہنچنے میں کامیاب ہوئے۔ انہی دو بچ جانے والوں کی اطلاع پر امدادی کارروائی ممکن ہو سکی۔
صحرائے صحارا میں اس وقت درجہ حرارت 45 سے 50 ڈگری سینٹی گریڈ تک پہنچ جاتا ہے۔ یہ علاقہ سالانہ سینکڑوں اموات کا گواہ بنتا ہے جن میں زیادہ تر مہاجرین اور مسافر شامل ہوتے ہیں۔

متعلقہ پوسٹ