جشن یوم آزادی کی تقریب کا انعقاد آج پاکستان ہاؤس، برلن میں کیا گیا۔
تقریب کا آغاز تلاوت کلام پاک سے ہوا، جس کے بعد جرمنی میں پاکستان کی سفیر محترمہ ثقلین سیدہ نے پاکستان کے قومی ترانے کی دھن پر قومی پرچم لہرایا۔ تقریب کے دوران جرمنی کا قومی ترانہ بھی بجایا گیا۔
اس موقع پر صدر پاکستان، وزیراعظم پاکستان اور نائب وزیراعظم پاکستان کے یوم آزادی کے پیغامات حاضرین کو پڑھ کر سنائے گئے۔
اپنےخطاب میں، سفیر ثقلین سیدہ نے تقریب میں شرکت کرنے والے پاکستانیوں، جرمن معززین اور پاکستان کے دوستوں کو تہہ دل سے مبارکباد دی۔ یوم آزادی کے تقدس اوراہمیت پر زور دیتے ہوئے انہوں نے کہا کہ آزادی ایک مقدس امانت ہے جو قائداعظم محمد علی جناح اور علامہ اقبال کی قیادت میں ہمارے آباؤ اجداد کےنظریے اور قربانیوں سے حاصل کی گئی تھی۔
حالیہ برسوں میں پاکستان کی اہم کامیابیوں پر روشنی ڈالتے ہوئے، سفیر نے ملک کے معاشی استحکام، سبز توانائی اور موسمیاتی انصاف میں بڑھتے ہوئے مقام، اور پاکستان کے نوجوانوں کی قیادت میں آئی ٹی اور ٹیکنالوجی کے شعبے کی نمایاں طور پر پھیلتی ہوئی صلاحیت کو نوٹ کیا۔ انہوں نے اس بات پر روشنی ڈالی کہ اس سال کی تقریبات خاص تاریخی اہمیت کی حامل ہیں کیونکہ پاکستان قائداعظم محمد علی جناح کے 150ویں یوم پیدائش کی یاد منا رہا ہے، اورکہا کہ ہم قائد کے سنہری اصول اتحاد، ایمان اور نظم و ضبط پر عمل پیرا ہو کرمزیدترقی کی جانب گامزن ہو سکتے ہیں۔
تقریب کی خاص بات ڈاکٹر سینٹا ماریا اینا سلر کو ان کی انسانی خدمات، دیہی خواتین کوبااختیار بنانے اور پاکستان میں کمیونٹی کی ترقی میں نمایاں خدمات کے اعتراف میں اعزاز دیا گیا۔
تقریب کا اختتام جشن آزادی کا کیک کاٹنے، پاکستانی فنکار کی لائیو میوزیکل پرفارمنس اور روایتی پاکستانی ریفریشمنٹ کے ساتھ ہوا۔ اس تقریب میں پاکستانی تارکین وطن، جرمن حکام، سفارت کاروں اور پاکستان کے خیر خواہوں نے بڑی تعداد میں شرکت کی۔
برلن
14 اگست 2026
