امریکہ کی مشرق وسطیٰ کے سفر پر نظرثانی کی اپیل، کشیدگی میں اضافے کا خدشہ

adv 200926 d


واشنگٹن (انٹرنیشنل ڈیسک): امریکی محکمہ خارجہ نے مشرق وسطیٰ میں بڑھتی کشیدگی کے پیش نظر امریکی شہریوں سے خطے کے سفر پر دوبارہ غور کرنے کی اپیل کی ہے۔ محکمے نے پروازوں کی منسوخی، فضائی حدود کی بندش اور دیگر سفری رکاوٹوں سے بھی خبردار کیا ہے۔
محکمہ خارجہ کے ٹریول ڈاٹ گوو اکاؤنٹ نے سوشل میڈیا پیغام میں کہا کہ خطے میں موجود امریکیوں کو زیادہ احتیاط برتنی چاہیے۔ پیغام کے مطابق سیکیورٹی ماحول پیچیدہ ہے اور غیر متوقع طور پر کشیدگی بڑھنے کا امکان ہے۔
انتباہ میں کہا گیا کہ ایران کی حمایت یافتہ حوثی سعودی عرب کے خلاف کارروائیوں میں ملوث رہے ہیں، جن میں شہری ہوائی اڈوں سے متعلق حملے بھی شامل ہیں، اور یہ تنازع ”تیزی سے بڑھ سکتا ہے“۔ خطے کا سفر کرنے والوں کو ہوائی اڈوں اور ایئر لائنز کی تازہ ترین معلومات پر نظر رکھنے کا مشورہ دیا گیا ہے۔
محکمہ خارجہ نے مزید کہا کہ مشرق وسطیٰ سے باہر بھی امریکی سفارتی تنصیبات کو نشانہ بنایا گیا ہے۔ ایران اور اس کے حامی گروہ دنیا بھر میں امریکی مفادات، امریکی کاروباروں اور دیگر اداروں کو بھی نشانہ بنا سکتے ہیں۔
یہ انتباہ حوثیوں کے نئے حملوں اور سعودی عرب سے متعلق کشیدگی کے دوران سامنے آیا ہے، جو خطے میں سیکیورٹی الرٹس اور فوجی واقعات کے سلسلے کے بعد جاری کیا گیا۔

متعلقہ پوسٹ