فرانس: عدالت نے مسلم طلبہ کے اسکول کی چھ ماہ کی بندش برقرار رکھی

schoo 081026 d


پیرس (انٹرنیشنل ڈیسک): فرانس کی ایک انتظامی عدالت نے شمالی شہر کریل میں مسلم طلبہ کے زیر تعلیم نجی اسکول "الغزالی” کی چھ ماہ کی بندش کو برقرار رکھا ہے۔
امیئن کی انتظامی عدالت نے اسکول کا انتظام چلانے والی انجمنوں کی دو درخواستیں مسترد کر دیں، جن میں اوائز پریفیکچر کے بندش کے حکم کو معطل کرنے اور اسکول دوبارہ کھولنے کی استدعا کی گئی تھی۔ عدالت کے مطابق تعمیراتی کام جاری ہونے کے باوجود اسکول نے طلبہ کیلئے تمام ضروری "حفاظتی ضمانتیں” فراہم نہیں کیں۔
بندش کا حکم ۳۰ ستمبر سے نافذ ہے اور چھ ماہ جاری رہے گا۔ اسکول میں پرائمری، مڈل اور ہائی اسکول کی سطح پر تقریباً ۲۵۰ طلبہ زیر تعلیم ہیں۔ عدالت نے انجمنوں کی اس دلیل کو بھی مسترد کر دیا کہ بندش کے سنگین مالی نتائج ہوں گے، اور کہا کہ حکم معطل کرنے کیلئے درکار خصوصی فوری ضرورت ثابت نہیں کی گئی۔ خاندانوں کے پاس بچوں کو دوسرے اسکولوں میں داخل کرانے کیلئے ۱۵ دن ہیں۔
رپورٹ کے مطابق اسکول کا جون اور ستمبر میں حفاظتی معائنہ ہوا تھا، اور ایک سیفٹی کمیشن نے پرائمری تعلیم کیلئے استعمال ہونے والی عمارت میں "بے ضابطگیوں” کی نشاندہی کی۔ پریفیکچر نے ۲۹ ستمبر کو بندش کا حکم دیا، جس میں بعض کمروں کے استعمال، اسکول کے آپریٹنگ انتظامات اور حفاظتی مسائل پر خدشات کا حوالہ دیا گیا۔ انتظامی انجمنیں ۱۰ دن کے اندر فیصلے کے خلاف اپیل کر سکتی ہیں۔

متعلقہ پوسٹ