(ویب ڈیسک )آسٹریلیا نے واضح کیا ہے کہ اسے روسی ایندھن خریدنے کی ضرورت نہیں اور وہ روس سے ایندھن کی خریداری پر پابندی برقرار رکھے گا، تاکہ یوکرین پر حملے کے نتیجے میں روس کو معاشی فائدہ نہ پہنچ سکے۔
بین الاقوامی خبر رساں ادارے بلومبرگ کے مطابق آسٹریلیا کے وزیر برائے موسمیاتی تبدیلی و توانائی کرس بوون نے ہفتے کے روز مغربی سڈنی میں پریس کانفرنس کرتے ہوئے کہا کہ آسٹریلیا نہ تو روسی ایندھن چاہتا ہے اور نہ ہی اسے اس کی ضرورت ہے۔
کرس بوون کا کہنا تھا کہ آسٹریلیا نہیں چاہتا کہ روسی صدر ولادیمیر پیوٹن کو مشرقِ وسطیٰ کی جنگ سے فائدہ حاصل ہو۔ انہوں نے واضح کیا کہ امریکا کیا فیصلہ کرتا ہے، یہ اس کا اپنا معاملہ ہے، تاہم آسٹریلیا اپنی پالیسی تبدیل نہیں کرے گا۔
یہ بھی پڑھیں:یوکرینی صدر زیلنسکی کا امریکا اور عالمی طاقتوں کو بڑا انتباہ
یہ بیان امریکی صدر ڈونلڈ ٹرمپ کے روسی ڈیزل سے متعلق اقدام کے تناظر میں سامنے آیا ہے۔ آسٹریلیا نے اپنے مؤقف میں واضح کیا ہے کہ وہ روس سے ایندھن کی خریداری کی اجازت دینے کے بجائے موجودہ پابندی برقرار رکھے گا۔
آسٹریلوی حکومت کے مطابق اس پالیسی کا مقصد روس کو جنگ کے ذریعے معاشی فائدہ حاصل کرنے سے روکنا ہے۔ وزیر کرس بوون کے بیان سے ظاہر ہوتا ہے کہ امریکا کے ممکنہ فیصلوں سے قطع نظر آسٹریلیا روسی ایندھن کے معاملے پر اپنا موجودہ مؤقف برقرار رکھنے کا ارادہ رکھتا ہے۔
