غریب اور کم تعلیم یافتہ آبادی کو دائمی بیماریوں کے زیادہ خطرات اور علاج میں رکاوٹوں کا سامنا: ڈبلیو ایچ او

نیویارک: عالمی ادارۂ صحت (ڈبلیو ایچ او) نے کہا ہے کہ غریب اور کم تعلیم یافتہ آبادیوں کو دائمی بیماریوں کے زیادہ خطرات کے ساتھ ساتھ تشخیص اور علاج تک رسائی میں بھی رکاوٹوں کا سامنا ہے۔ یہ بات ادارے کی غیر متعدی بیماریوں میں عدم مساوات پر پہلی عالمی تشخیصی رپورٹ میں سامنے آئی ہے۔
رپورٹ میں کینسر، قلبی امراض، دائمی سانس کی بیماریوں اور ذیابیطس کے علاوہ تمباکو اور الکحل کے استعمال، موٹاپا، غیر صحت بخش غذا، کم جسمانی سرگرمی اور فضائی آلودگی جیسے خطرات کا جائزہ لیا گیا۔
نتائج کے مطابق کم اور درمیانی آمدنی والے ممالک میں کم تعلیم یافتہ آبادیوں میں ہائی بلڈ پریشر اور ذیابیطس کی شرح زیادہ ہے، جبکہ غریب اور کم تعلیم یافتہ خواتین کو سروائیکل کینسر کی اسکریننگ کم ملتی ہے۔
رپورٹ میں کہا گیا کہ کئی ممالک میں دیہی آبادیوں کو شہری باشندوں کے مقابلے ہائی بلڈ پریشر کی تشخیص و علاج اور کینسر اسکریننگ میں زیادہ رکاوٹوں کا سامنا ہے۔ مردوں میں تمباکو اور الکحل کا استعمال زیادہ پایا جاتا ہے، تاہم ان میں ہائی بلڈ پریشر کی تشخیص اور علاج کا امکان کم ہوتا ہے۔
ڈبلیو ایچ او کے ماہر احمد رضا حسین پور نے کہا کہ یہ عالمی سطح پر غیر متعدی بیماریوں اور ان کے خطرات میں عدم مساوات کی منظم پیمائش کی پہلی کوشش ہے۔ ادارے نے حکومتوں سے کہا ہے کہ وہ کم خدمات یافتہ آبادیوں کے لیے روک تھام، اسکریننگ اور علاج کی خدمات بہتر بنائیں اور صحت کی دیکھ بھال تک رسائی کے خلا کی نشاندہی کے لیے ڈیٹا اکٹھا کرنے کا نظام مضبوط کریں۔