مالیاتی جرائم کی روک تھام، ایف آئی اے اور بینکوں کے روابط مزید مستحکم بنانے کا عزم

لاہور (نمائندہ خصوصی وائس آف جرمنی) ڈائریکٹر ایف آئی اے لاہور کیپٹن (ریٹائرڈ) محمد علی ضیاء کی زیرِ صدارت ایف آئی اے لاہور میں قومی اور پرائیویٹ کمرشل بینکوں کے کمپلائنس ڈویژن کے سربراہان کا اہم اجلاس منعقد ہوا۔ اجلاس میں تمام بڑے قومی و کمرشل بینکوں کے نمائندگان نے شرکت کی۔
اجلاس کا مقصد مالیاتی جرائم کی روک تھام، ریگولیٹری کمپلائنس میں بہتری، معلومات کے بروقت تبادلے اور اس ضمن میں درپیش چیلنجز کے حل پر مشاورت تھا۔
بینکنگ نمائندگان نے اجلاس کے دوران اپنے تحفظات، عملی مشکلات اور تجاویز پیش کیں۔ شرکاء نے منی لانڈرنگ کی روک تھام کے لیے مشکوک لین دین کی بروقت رپورٹنگ پر زور دیا جبکہ ایف آئی اے اور بینکنگ سیکٹر کے مابین معلومات کے تیز اور مؤثر تبادلے کے طریقہ کار پر بھی اتفاق کیا گیا۔
اجلاس میں یہ فیصلہ بھی کیا گیا کہ ایف آئی اے افسران کی پیشہ ورانہ تربیت کے لیے بینکنگ سیکٹر کے ساتھ مشترکہ ٹریننگ سیشنز منعقد کیے جائیں گے۔ مزید برآں، بینکنگ فراڈ اور مالیاتی جرائم میں ملوث عناصر کے خلاف قانونی کارروائی، ریکوری اور عدالتوں سے سزائیں دلوانے کے عمل کو بھی مزید مؤثر بنانے پر غور کیا گیا۔
ڈائریکٹر ایف آئی اے لاہور نے اس موقع پر کہا کہ ایف آئی اے اور بینکاری شعبے کے درمیان مؤثر روابط اور مشترکہ اقدامات وقت کی ضرورت ہیں۔ انہوں نے مکمل ادارہ جاتی تعاون کی یقین دہانی کرائی۔
اجلاس میں فیصلہ کیا گیا کہ اس سلسلے میں آئندہ سہ ماہی جائزہ اجلاس منعقد کیے جائیں گے تاکہ پیش رفت کا جائزہ لیا جا سکے اور باہمی تعاون کو مزید ادارہ جاتی شکل دی جا سکے۔