حکومت پاکستان کا آزاد کشمیر احتجاجی معاملے میں کردار ادا کرنے کا فیصلہ

اسلام آباد: وزیر اعظم آفس سے جاری نوٹیفکیشن کے مطابق حکومت پاکستان نے آزاد کشمیر میں جاری احتجاجی صورتحال میں براہ راست کردار ادا کرنے کا فیصلہ کر لیا ہے۔
نوٹیفکیشن کے تحت وزیر اعظم شہباز شریف نے وفاقی وزیر برائے امور کشمیر و گلگت بلتستان امیر مقام اور وفاقی وزیر برائے پارلیمانی امور طارق فضل چوہدری کو فوری طور پر مظفرآباد روانہ ہونے کی ہدایت کی ہے۔ دونوں وزرا آج آزاد کشمیر پہنچ کر مقامی حکام اور احتجاجی قیادت سے ملاقاتیں کریں گے۔
ذرائع کے مطابق، وزرا کو یہ ذمہ داری دی گئی ہے کہ وہ مظاہرین کی نمائندہ کمیٹیوں اور حکومت آزاد کشمیر کے درمیان مذاکراتی عمل کو آگے بڑھائیں اور مسائل کے حل کے لیے تجاویز مرتب کریں۔ اس دوران مظفرآباد میں اعلیٰ سطحی اجلاس بھی متوقع ہے، جس میں احتجاج کی وجوہات، عوامی مطالبات اور ممکنہ حکومتی اقدامات پر تفصیل سے غور کیا جائے گا۔
حکومتی حلقوں کا کہنا ہے کہ اسلام آباد کی سطح پر فیصلہ سازی کا مقصد صورتحال کو مزید کشیدہ ہونے سے بچانا اور عوامی خدشات کو سن کر پرامن طریقے سے معاملات طے کرنا ہے۔ اس سلسلے میں دونوں وزرا کو ہدایت دی گئی ہے کہ وہ مظاہرین کے مطالبات کو براہ راست وزیر اعظم کو رپورٹ کریں اور حل کے لیے قابلِ عمل تجاویز پیش کریں۔
سیاسی مبصرین کے مطابق، وفاقی حکومت کی یہ پیش رفت اس امر کی عکاسی کرتی ہے کہ اسلام آباد آزاد کشمیر میں بڑھتی ہوئی بے چینی کو سنجیدگی سے دیکھ رہا ہے اور احتجاجی مسئلے کو بات چیت کے ذریعے حل کرنے کا خواہاں ہے