لیفٹیننٹ جنرل عاصم ملک کی بطور ڈی جی آئی ایس آئی مدتِ ملازمت میں توسیع

اسلام آباد: سیکورٹی ذرائع کے مطابق ملک کی خفیہ ایجنسی انٹر سروسز انٹیلی جنس (آئی ایس آئی) کے سربراہ لیفٹیننٹ جنرل عاصم ملک کی مدتِ ملازمت میں توسیع کر دی گئی ہے۔ وہ اپنے موجودہ عہدے پر خدمات جاری رکھیں گے، تاہم یہ واضح نہیں کیا گیا کہ توسیع کتنی مدت کے لیے کی گئی ہے۔
لیفٹیننٹ جنرل عاصم ملک نے 30 ستمبر 2024 کو ڈائریکٹر جنرل آئی ایس آئی کے طور پر عہدہ سنبھالا تھا۔ اس سے قبل وہ جنرل ہیڈکوارٹرز (جی ایچ کیو) میں ایڈجوٹینٹ جنرل کے طور پر فرائض انجام دے رہے تھے۔
فوجی ذرائع کے مطابق لیفٹیننٹ جنرل عاصم ملک نے 80ویں لانگ کورس سے پاک فوج میں شمولیت اختیار کی اور اپنے کورس میں اعزازی شمشیر (سورڈ آف آنر) حاصل کی۔ ان کا تعلق بلوچ رجمنٹ سے ہے۔
وہ اس سے پہلے بلوچستان میں انفینٹری ڈویژن اور وزیرستان میں انفینٹری بریگیڈ کی کمان کر چکے ہیں۔ اس کے علاوہ وہ نیشنل ڈیفنس یونیورسٹی (این ڈی یو) میں چیف انسٹرکٹر اور کمانڈ اینڈ اسٹاف کالج کوئٹہ میں انسٹرکٹر کے طور پر بھی خدمات انجام دے چکے ہیں۔
لیفٹیننٹ جنرل عاصم ملک ملٹری آپریشنز ڈائریکٹوریٹ میں بھی فرائض انجام دے چکے ہیں۔ وہ فورٹ لیون ورتھ (امریکہ) اور رائل کالج آف ڈیفنس اسٹڈیز (برطانیہ) کے گریجویٹ ہیں۔ انہیں 6 اکتوبر 2021 کو لیفٹیننٹ جنرل کے عہدے پر ترقی دی گئی تھی۔
انہوں نے نیشنل ڈیفنس یونیورسٹی پاکستان سے امریکہ پاکستان تعلقات پر پی ایچ ڈی کی ڈگری حاصل کی۔ بلوچستان اور وزیرستان جیسے حساس علاقوں میں عسکری قیادت کے تجربات کے باعث انہیں پاک فوج میں ایک قابلِ اعتماد اور پیشہ ور افسر کے طور پر جانا جاتا ہے۔